Minister Otmar Oduber na Divi: Inversionnan asina ta reconfirma e compromiso cu nos tin pa continuamente cuida nos pan di cada dia
Diahuebs ultimo industria turistico ta sigui celebra cu inauguracion di un edificio completamente sostenibel na Divi Resorts. Pa e momento special aki Minister di turismo Otmar Oduber tabata presente y a hiba palabra. Locual sigur a resalta den e celebracion aki ta e compromiso continuo y e confiansa den e industria turistico di nos isla y Producto Aruba en general.
Minister Oduber durante su discurso a menciona cu un di Aruba su punto fuerte ta relacion estrecho entre e sector priva y publico. Den e caso di e famia di Divi Resorts ta su personal y e pasion cu nan tin pa logra obhetivonan y nan metanan. E mandatario a elogia Divi pa un otro bon trabou y pa ta un bon ehempel di un partner cu continuamente ta busca formanan pa mehora e experiencia di nan huespednan. Sr. Oduber ta sigui bisa: "E ta encaha perfectamente cu e vision cu nos tin pa mehoracion di e experiencia di nos bishitantenan, sigurando cu nos por cumpli cu e demanda di e turista mas afluente y cu turistanan cu ta conociendo cambio di comportacion."
E mandatario ta sigui comenta cu e celebracion aki ta accentua con Divi ta kere den e inversionnan haci pa Gobierno di Aruba, partnernan manera ATA, Aeropuerto y AHATA djis pa menciona algun. "E ta reconfirma e compromiso cu nos tin y cu nos ta comparti, pa continuamente cuida nos pan di cada dia.... cu ta nos industria turistico. Ta e tipo di compromiso aki cu lo sigura cu futuro retonan, lo continua di ta den discusion, lo keda adresa inmediatamente, y idealmente lo keda efectivamente resolvi." E ta comenta cu ta e vision di continuamente kier ta e miho como producto turistico conhuntamente cu nos isla y su hendenan lo prevalece, a pesar di diferencianan di opinion cu naturalmente por existi devez en cuando.
Minister Oduber a termina su discurso felicitando Divi pero tambe gradiciendo nan pa e contribucion valioso y confiansa cu nan tin den Aruba como Producto.
Expresionnan haci den e articulo aki no necesariamente ta refleha opinion di ArenaPoliti.co