Mike Eman lo bay den historia  como un Promer Minister di “EMANIPULADOR”.  Mike mester wordo compara cu un carne den cuero di lobo. Na Bo cas e ta pasa bababo pero mentalmente e no tin cunes.  No ta manera con Mike Eman a abusa di e pueblo aki creando un MEGA DEBE cu nos yiunan pa mas di 30 aña largo lo mester bay paga. Ora papia di e MEGA DEBE mester splica cu den 25 aña despues di Status Aparte tur gobierno di signatura MEP of AVP cu a goberna e periodo di 25 aña desde 1986 esta desde Status Aparte,   a laga atras un debe nacional di 2.2 BIYON hunto, pero atrobe den 25 aña.  Locual AVP a haci desde 2009 pa 2013, esta den apenas 4 aña a kibra tur sentido comun di bon gobernacion y di hendenan sano mentalmente. Den apenas 4 aña e debe nacional a wordo redobla pa mas di 4 BIYON y ainda ta creciendo. Pueblo no por sinta keto mas y waak un grupito di gobernantenan destrui e baranca aki cu ayudo di prensa comprometi unda mayoria ta riba payroll di gobierno of ta wordo recompensa cu fabornan politico di un of otro manera entre otro contract of tereno. “EMANIPULACION” aki mester yega su fin. Den presupuesto 2016 cu lo bay wordo trata fin di e luna aki, despues di un analisis profundo, por tuma nota cu e fiesta lo continua. Un total di 100 miyon florin presupuesta pa amigonan.  Entre otro 33 miyon pa 338 coordinador ganando un averahe di mas di Afl. 8000 florin pa luna. 25 Miyon pa Huur di edificio na amigonan. No na famia Croes, pero esaki a aumenta drasticamente den comparacion cu 2009. 5 Miyon na biahamento y propaganda pa companianan di amigonan cu mester keda propaganda e trabao “emanipulando” cu tur cos ta bon aparentando un Aruba di 5 STREA. Un otro 15 Miyon na amigonan abogado, entre otro propio casa di Baba Herde kende aparentemente tambe tin 6 aña stricando for di placa di e pueblo aki. 16 Miyon na (2) minister extra desde cu AVP a gana eleccion na 2013 cual no tabata necesario pero pa presion politico y promesa e tempo aya na Juan David y Paul mester a crea e espacio aki riba lomba di nos humilde pueblo. AVP practicando un gobernacion di clientelismo. Pueblo, e 100 Miyon aki den 2016 por a wordo inverti den siguridad di nos pueblo. Tambe esaki por a wordo inverti den mihor educacion dunando tur mucha e oportunidad pa studia. Usando esaki debidamente por contruibi na baha costo di bida.  Esaki por a cubri tambe subsidionan cu a wordo corta for di nos grandinan. Pues por a haci mucho mihor uso di dje pa alivia dolornan real den pueblo enbes di regala amigonan na un manera di hipocrita. Ban waak si e 13 parlamentarionan cu enrealidad no ta sirbi e pais aki na nada ta cla pa grita “VOOR” fin di luna hundiendo Aruba mas ainda y ban waak kico ta e consecuencia despues. 100 MIYON pa amigonan pa pueblo paga ta inaceptabel.

Expresionnan haci den e articulo aki no necesariamente ta refleha opinion di ArenaPoliti.co