Francis Jacobs (MEP): Betico no solamente ta nos Libertador, e ta e Tata di Nos Pueblo di Aruba
E aña aki nos como ciudadanonan di e pida baranca aki cu yama Aruba ta celebra 30 aña di nos Status Aparte. Un logro cu sigur tabata tin luchanan incansabel y sangriente pa logra esaki. Awe nos ta recorda nos libertador Gilberto Francois (Betico) Croes cu a hiba e lucha aki hunto cu su partido MEP y e pueblo di Aruba. Aunke den e ultimo añanan nos por a mira cu den tur forma a purba di cambia historia, sinembargo historia niun hende no por cambia, pasobra historia ta Dios su destino pa cada un di nos y historia a demostra e lucha aki cu nos Libertador a logra pa nos. Ainda ami ta corda como un hoben mi tabata para na aeropuerto momento cu nos Libertador Betico Croes a yega for di Hulanda y a wordo ricibi pa un multitud di ciudadanonan y a trece e bon noticia cu nos a logra nos libertad y cu nos por ta baas den nos mes cas. Betico a hiba un discurso nacional y el a enfatisa den su discurso cu lagrima den su wowonan y a pidi pa tur nos yiu y yiu di nos yiunan y tur generacion cu ta sigui pa traha y conserva loke nos a logra (nos libertad) y a pidi tur e mayornan pa siña educa nan yiunan pa nan hisa nan bandera, canta nos himno y conserva nos Patria Aruba y dia cu loke nos a logra wordo menasa atrobe, esey ta nifica Guera. Esakinan tabata palabranan di nos Libertador Gilberto Francois (Betico) Croes. Nos libertador Betico Croes durante un di su discursonan na Seri’ Noca a menciona cu e no ta solamente un Tata di un famia comun, pero e ta Tata di henter un pueblo, un pueblo cu yama Aruba. Mi mensahe na tur nos ciudadanonan ta pa hisa boso bandera y canta boso himno y siña boso yiu y nan yiunan y e generacionnan cu ta sigui ken ta Betico, ken ta nos Libertador y cu oficialmente un decreto a wordo firma den parlamento na 1998 caminda unanimamente Gilberto Francois (Betico) Croes ta nos Libertador desde 1986 oficialmente. Betico no solamente ta nos Libertador pero e ta Tata di Nos pueblo. Pabien Aruba!
Expresionnan haci den e articulo aki no necesariamente ta refleha opinion di ArenaPoliti.co