Fraccion AVP: MEP ta sigui midi cu dos midi
Miembronan di fraccion di MEP a haci'e un custumber pa paden y pafo di parlamento, acusa hende, lastra hende y yama tur minister y tur miembro di fraccion di AVP pa tur sorto di cosnan sushi. TUR e acusacion y storianan aki ta sali for di nan fantasia maligno. E siman aki miembronan di MEP a usa tur nan tempo durante di dos dia pa atrobe yama tur minister di AVP pa tur sorto di cos sushi y a purba pa susha nan nomber den forma baho.
Pero awe, ora UN BIAHA, UN miembro di e fraccion di MEP a wordo yama "sinberguensa" pa motibo di su comportacion pa hopi aña, e miembronan di MEP a sinti nan mes ofendi! Cu exitacion y exajeracion nan a expresa nan indignacion pasobra nan lo a wordo ofendi. Obviamente e fraccion di MEP ta sinti cu nan tin e derecho pa lastra y acusa tur hende manera nan ta desea. Pero ora nan mes wordo trata un tiki mescos, ta un inhusticia grandi ta wordo cometi. Atrobe, mescos cu MEP a haci den gobernacion, awor nan ta MIDI CU DOS MIDI: un midi pisa pa otronan y otro midi suave pa nan mes!
Expresionnan haci den e articulo aki no necesariamente ta refleha opinion di ArenaPoliti.co