Evelyn Wever-Croes (MEP): MEP no por sostene e presupuesto 2016
E MEGA DEBE TA SIGI CRESE
ORANJESTAD -- Lider di MEP Evelyn Wever-Croes durante su 'stemmotivering' a duna un splicacion dicon a vota contra di e presupuesto.
"Awe na Hulanda e minister encarga cu Reino a declara cu Aruba mester pone orden den e desorden financiero. E presupuesto nos dilanti tin conseho negativo di tanto Raad van Advies como CAFT y den e Nota di Cambio no a cambia nada substancial.
E problemanan di e pais aki ta hopi serio, pero e solucion no ta dificil. Unico cos cu bo mester ta un vision, determinacion y curashi. Pero den e presupuesto aki bo no ta mira esaki, al contrario. Bo ta mira cu fundacionnan cu ta yuda esnan den necesidad tres anja pasa a wordo corta te den nan weso y te awe no por haya e sumanan cu nan tin mester. Pero di otro banda gastonan di biahamento, propaganda, huurmento y abogado si ta subi cu 12%. E enfasis den e presupuesto no ta pone e ser humano central. E ta pone e biahenan di placer y ego di Mike Eman central.
Pa soluciona e problemanan di e pais aki bo mester tin un vision pa trese bienestar pa bo pueblo. Bo mester tin determinacion pa pone e ser humano central y bo mester tin curashi pa caba cu e abuso. E gobierno aki no tin esakinan y e presupuesto tampoco. Pesey nos a vota contra e presupuesto.
Mike Eman ta mas preocupa con e lo keda recorda den historia, cu con e ta goberna. Betico Croes dfm a bai den historia como e homber cu a lucha pa libertdad di su pueblo pa su pueblo por ta felis, pasobra un pueblo cu no ta liber no por ta felis. Mike Eman ta bai den historia como e homber cu a endeuda nos pais, y ta orguyoso cu el'a endeuda nos yuinan y nan yiunan. Mientras Betico lo wordo recorda semper pa su frase legendario "E felicidad cu mi ta desea pa mi yuinan mi ta desea pa henter e pueblo", Mike Eman lo wordo recorda pa su frase legendario "Cu orguyo mi a endeuda e pais aki, pa nos futuro generacionnan bai paga". Esey so caba ta indica bo ki tipo di maneho e gobierno aki ta hibando, y ki tipo di lider Mike Eman ta realmente.
Pesey e presupuesto no por conta cu nos aprobacion.
Expresionnan haci den e articulo aki no necesariamente ta refleha opinion di ArenaPoliti.co