ORANJESTAD – Tempo cu a cuminsa traha riba loke awe ta conoci como 'Green Corridor', gran parti di e plannan existente 'den lachi' tabata data di añanan 70 y tambe tabata haci uzo di un ruta door di areanan di naturalesa y tambe un gran cantidad di cunucu. For di punto di bista di Gabinete Mike Eman, esaki no tabata algo deseabel y a cuminsa busca alternativa. Expertonan, despues di a haci trabou di esaki, a presenta algun opcion y a resulta cu esun cu tabata tin menos impacto riba Aruba su naturalesa, ta loke awe tin riba mesa. A denomina e plan 'Green Corridor' pasobra e ta e opcion menos dañino pa naturalesa di nos isla. Esaki ta resumi un parti importante di loke Prome Minister Mike Eman a splica durante un conferencia di prensa dialuna mainta na momento cu a basha e prome pida capa di asfalt net un poco pariba di Aeropuerto Internacional Reina Beatrix.

Den e diseñonan pa construi e 'vierbaansweg' entre Oranjestad y San Nicolas, a scoge pa construi e caminda adicional na banda pazuid di e caretera bieu y esaki a encera cu no mester a elimina un parti grandi di e vegetacion existente. Pa Gabinete Eman I y II e tabata un decision dificil, ya cu den ambos banda mester a sacrifica un parti di  vegetacion, pero cu e pensamento cu esaki mester ta lo mas minimo posibel y recompensa esaki di un forma of otro. “Nos a scoge pa expande na banda di e caretera actual te unda cu por pa haci esaki un caminda di 4 via y no scoge e trayecto cu lo a corta den naturalesa. Nos a scapa un cantidad di naturalesa y cunucu.”

Adicionalmente a disidi cu e seccion di 'Green Corridor' for di Mahuma te na Pos Chiquito, lo no wordo desaroya. Si tuma na cuenta proyectonan similar na Aruba den pasado, manera Plan Sasaki y Vondellaan, semper a 'verkavel' banda di e caminda pa asina por tin un efecto economico pa gobierno hunto cu e proyecto. Pero den caso di 'Green Corridor', caminda cu e meta tabata pa preserva mas naturalesa cu ta posibel y na e mesun tempo mehora e fluho di trafico entre Oranjestad y San Nicolas, a disidi cu e seccion ey, lo no wordo destina pa desaroyo. “Ta poco parti di mundo ta crea un infrastructura asina costoso y ta dicidi cu na tur dos banda di caminda ta wordo conserva pa naturalesa, algo cu nos ta hopi contento di a haci,”e mandatario a expresa.

E idea ta cu na final di e proyecto aki, e caminda for di aeropuerto te cu San Nicolas ta wordo caracterisa pa su beyeza berde, cu hopi mata, parke y un fietspad extendiendo for di Aeropuerto te na San Nicolas. Un ambiente asina, segun pensamento di e Gobernacion di Prome Minister Mike Eman, ta eleva e calidad di bida y mehora e posibilidad pa movecion sano pa ciudadanonan di Aruba, particularmente di esnan di pariba di brug.

Expresionnan haci den e articulo aki no necesariamente ta refleha opinion di ArenaPoliti.co