Desaroyonan rond refineria ta indica un mehoracion di e outlook economico

ORANJESTAD - E agencia di evaluacion FitchRatings ta reafirma e rating di Aruba cu un perspectiva stabil. Deficit di Aruba a baha di 9,4% pa 2% di GDP den un aña di tempo. E agencia ta indica cu Gobierno ta haciendo progreso den stabilisa finansa publico. “E esfuerzo y empeño di Gobierno di Aruba pa logra sostenibilidad den finanza publico, sigur a wordo reconoci cu e resultado aki,” Minister Bermudez, encarga cu Finanza Publico a declara. “Ademas FitchRatings ta indica cu e deficit lo sigui disminui durante añanan benidero”. Na 2017 presupuesto di Pais Aruba ta conta cu un deficit di 0,5% di e GDP. Pa loke ta trata perspectivanan economico, Fitch Ratings ta conclui cu e desaroyonan rond di refineria ta mustra di mehora e outlook economico.

E deficit di gobierno tabata 3.7% di GDP na 2015 pa loke ta placa cash manera cu Banco Central a raporta loke ta den liña cu gobierno su meta. “A base di transaccionan, deficit di Gobierno pa aña 2015 ta mucho mas abou,” Minister Bermudez a sigui splica. E datonan mas reciente di gobierno ta mustra cu e deficit a yega te na 2% di e GDP, segun FitchRatings. Esaki ta algo sumamente positivo mirando con na 2014 e deficit a yega te 9.4%, segun cifranan di Banco Central na momento cu gobierno a recapitalisa riba e fondo di pensioen APFA. “Fitch ta premira cu e deficit ta sigui baha na 2017 y enfoke di Gabinete Mike Eman II ta pa tin un presupuesto balansa na 2018, bahando asina e debe di gobierno,” segun e mandatario encarga cu Finanza Publico. “Maneho financiero ta keda cu su retonan y presionnan, pero Gobierno di Aruba lo sa si mitiga e efectonan negativo riba termino mediano.”

Pa loke ta trata crecemento economico, e agencia FitchRatings ta premira un crecemento di 2% na 2017 como minimo. “Tur esaki lo cambia na crecementonan hopi mas halto na momento cu e refineria cuminsa cu su operacionan,” Minister Bermudez a splica. Asina cu esaki wordo formaliza, FitchRatings lo revisa e pronosticonan economico riba termino mediano. Aumento den consumo priva, reapertura di e refineria y un maneho finaciero exitoso cu ta reduci structuralmente e deficit y e debe nacional, seguramente lo tin como resultado un aumento di Aruba su rating, segun FitchRatings.

Expresionnan haci den e articulo aki no necesariamente ta refleha opinion di ArenaPoliti.co