ORANJESTAD – Lider di partido MEP Evelyn Wever-Croes a emeti e sigiente declaracion. 

Den nomber di fraccion di MEP den Parlamento y den nomber di partido MEP, mi ta expresa mi desaprobacion total pa e falta di respet den Parlamento y e abuso verbal y fisico entre e presidente di Parlamento sra. Marisol Lopez-Tromp y vice presidente di Parlamento sr. Chris Dammers diaranson 25 di mei. Falta di respet di e forma ey, ni agresion verbal ni fisico ta wordo tolera ni acepta den nos fraccion y tampoco den Parlamento. Cualquier cu por ta e diferencia di opinion, hamas esaki por hustifica agresion den ningun forma, y especialmente nunca agresion fisico den Parlamento.

Personalmente mi ta añadi cu hende mester stop di pensa cu por falta respet na hende muher asina facil. Tur loke ami mes a mira y scucha parlamentarionan di AVP bisa y hasi cu Marisol Lopez-Tromp den ultimo tempo, den MEP hamas a pasa y tanten ami ta lider hamas lo pasa tampoco! E forma con parlamentarionan di AVP ta trata otro, y e falta di respet cu segun nan ta masha normal den nan reunionnan, tin mi totalmente asombra.

Nos a expresa nos desaprobacion den un carta pa Gobernador, Presidente di Parlamento y Minister President den cual nos a condena e sucedido. Tambe nos ta urgi pa un investigacion wordo hasi cu urgencia y pa e rapport di investigacion wordo finalisa pronto pa asina wordo trata den un reunion publico den Parlamento mas pronto cu ta posibel pa esnan responsabel wordo teni responsabel tambe pasobra e hecho aki no por keda sin sanccion. Parlamento na e momento ey tambe lo debati riba e cambionan cu mester bin den e Reglamento di Orden di Parlamento pa evita cu algo asina ripiti.

Nos ta urgi prome minister Mike Eman, lider di partido AVP, pa atende cu e asunto aki cu prioridad, mirando e berguensa cu esaki ta causando nos pais. Esaki ta simplemente un simptoma di e malesa di mal gobernacion di e gobierno aki. Sr. Mike Eman awor si mester duna cara y mustra na cual banda e ta para y si e ta sostene abuso contra hende muher of si e tambe ta conden’e.

Un cos mester keda bon cla: MEP no ta tolera ni acepta cu hustamente den e sala cu nos mester defende nos muchanan, nos hende muhernan, nos grandinan, ta abusa di hende muher! E sucedido di awe tin mi den shock, hamas mi a pensa cu asuntonan di trabou den e fraccion di AVP ta wordo atendi di e forma ey. Den fraccion di MEP algo asina HAMAS a sucede, y tanten cu ami ta lider di MEP esaki hamas lo pasa tampoco!

Expresionnan haci den e articulo aki no necesariamente ta refleha opinion di ArenaPoliti.co