Reunionnan cu gremionan ta continua pa trata e ley di All-inclusive 

Despues cu siman pasa a sinta cu varios gremionan den nos comunidad, e siman aki reunionnan ta continua pa locual ta trata e ley pa regulacion di All-inclusive cu dentro di poco lo trata den Parlamento. AHATA tambe a haya su oportunidad pa sinta na mesa cu Minister Oduber pa combersa riba e preocupacionnan cu ta biba cerca nan y con lo por atende cu e preocupacionnan aki, mescos cu a haci cu entre otro Camara di Comercio, ATIA y e organisacion cu ta representa Real Estate nan na Aruba. E mandatario ta indica cu a palabra siman pasa cu AHATA cu lo continua cu e reunion diahuebs, unda AHATA di su banda lo haci un inventarisacion riba ley kico ta e puntonan specifico cu ta 'primi e sapato mas duro'. Sr. Oduber ta invita AHATA pa trece preocupacionnan dilanti, porta te hasta alternativa  dilanti cu lo por yuda den e proceso. E mandatario ta sigur cu tur hende den comunidad, cu excepcion di e asociacion di hotelnan,  a vocifera cu mester regula e fenomeno di All-inclusive. Mester percura pa un balansa saludabel cu a sa di traha pa turismo di Aruba te cu awor y regula pa evita crecemento rapido di e cantidad di cambernan All-inclusive den e inventario di acomodacion riba nos isla. E mandatario ta expresa cu tin varios instancia cu a manda carta pe demostrando nan aprobacion pa legislacion di e regulacion aki. Minister Oduber ta na altura cu AHATA kier un asina yama "cooling off period" pa nan por haya mas tempo pa cierto estudionan wordo haci. "Ma bisa nan cu nos ta habri pa tur alternativa, mirando cu na final bo lo kier yega mas cerca di un consenso y pesey nos ta na mesa keto bay. Nos a pidi nan pa trece formanan cu nan ta kere lo por atende cu e mesun problematica of crea e mesun solucionnan." Sr. Oduber a comparti tambe su opinion riba e asina yama "cooling off period" unda lo bay bek y discuti esaki den Conseho di Minister. "Un di e preguntanan haci riba e "cooling off period" ta si e hotelnan ta dispuesto pa den e periodo aki compromete cu Gobierno di Aruba, cu lo no continua cu proposicionnan of benta di propiedadnan cu ta existi na e momentonan aki cu cadenanan All-inclusive. Durante e reunion AHATA no a acepta esaki y a bisa di no por duna garantia riba esaki."

Minister Oduber ta indica cu si ta pidi pa un "cooling off period" mester por indica e motibo pa kico ta pidi pa esaki unda lo por mira si di berdad mester un periodo di tempo. "Unabes cu ta conoci kico ta e puntonan specifico di AHATA su inkietud, kico ta e preocupacionnan y kico ta e alternativanan, a base di esey lo por dicidi uno, si mester un periodo di tempo, y di dos, con largo e "cooling off period" aki lo mester ta. Pero esaki lo mester bay semper si condiciona cu no por continua negociacionnan of benta di propiedadnan cu ta existi na e momentonan aki."   

Minister di Turismo a mustra AHATA si cu e forma cu ta ataca den prensa no ta conduci na yega na e consenso cu ta buscando. " Nos ta purba na educa comunidad, mandando avisonan, pa mustra e diferente estudionan haci y tambe e experiencianan cu tin internacionalmente y localmente riba e tema di All-inclusive."

AHATA lo sinta un biaha mas na mesa cu Minister Oduber diahuebs awo. E mandatario ta reitera e pensamento cu na mesa ta unda ta yega na alternativanan, solucionnan y si no por yega na solucionnan, lo purba yega mas cerca di un consenso cu ta posibel. Minister Oduber ta termina bisando "Nos ta traha na bienestar general di nos comunidad. Ta comunidad ta vocifera su mes riba e tema aki unda a mustra cu mas All-inclusive no por wordo permiti aki na Aruba."

Expresionnan haci den e articulo aki no necesariamente ta refleha opinion di ArenaPoliti.co