Gabinete ME II: Prome Minister Mike Eman a haci un tremendo impacto na cumbre organisa pa Clinton Foundation, ‘Future of the Americas’
President Clinton tabata hopi cla den su combersacionnan cu Prome Minister Mike Eman cu e, ex- president di Merca y president di e prestigioso ‘Clinton Foundation’, a bin ta sigui e tremendo desaroyonan di Aruba den areanan di energia renobabel y desaroyo sostenibel y ta hopi impresiona cu nan. ‘Clinton Foundation’ p’esey a expresa nan deseo di explora con por colabora den futuro caminda Aruba ta sigui riba e trayectoria pa un prosperidad sostenibel.
Manera president Clinton a bisa den e reunion di dignatario y lidernan: “Mi ta gradicido pa e trabou cu boso ta haci, tur dia, pa mehora bidanan den nos hemisferio, y ta p'esey bo liderazgo den e evento aki ta asina importante... Mi ta spera cu boso intercambio riba e topiconan aki por continua den futuro y cu na final nan por bira accion. Mas importante ainda, mi ta spera boso pensa den grandi y actua di un manera determina. president Varela [di Panama] a invita boso ‘input’ pa e siguiente ‘Summit of the Americas’ oficial, y mi ta encurasha pa boso acepta su oferta.”
Prome Minister a participa tambe den dos reunion di mesa rondo, na unda el a comparti logronan di Aruba y tuma parti den discusionnan riba e futuro di e region cu algun di e lidernan comercial, politico y civico di e region, manera Isabel Saint Malo de Alvarado, Vice president di Panama; Alejandro Garcia Padilla, Gobernador di Puerto Rico; Carlos Slim, fundado di ‘Carlos Slim Foundation’; Stanley Motta, president di Copa Airline Holdings; Juan Manuel Santos, president di Colombia; Luis Alberto Moreno, president di Inter-American Development Bank; Jorge Gamilia, Vice president di World Bank di region Latino Americano y Caribe; entre otronan.
Den e prome Mesa Rondo a discuti tocante di, ‘Connectivity: The Emerging Challenge’ cu a focus riba maneranan pa crea surpasa e division digital cu tin den e Americanan, pa yega na un crecemento economico mas inclusivo. E di dos Mesa Rondo di e conferencia, ”Energy, Infrastructure, and the Environment” a enfoca riba mehora e capacidad nacionnan Latino America y Caribe pa general energia limpi.
Expresionnan haci den e articulo aki no necesariamente ta refleha opinion di ArenaPoliti.co