Cu ta inclui 12 mil 'Smart LED' y 6 mil 'Smart Meters' instala rond Aruba. 

ORANJESTAD – Diamars mainta Minister di Asuntonan General Mike Eman, Minister di Infrastructura Benny Sevinger y Minister di Energia, Mike de Meza a atende un presentacion na sala di Elmar na Playa pa haya un actualisacion di e proyecto Smart Grid awo cu e tin un luna di a cuminsa. Eric Tromp, Hefe di Seccion di Planiacion, Siguridad di Elmar tabata entre esnan cu a duna splicacion pa asina e mandatarionan por a haci nan pregunta, compronde con esaki ta beneficia pueblo, pero tambe duna comentario.

Tromp a duna di conoce cu e cambio pa luznan LED ta haci di e red di iluminacion publico, uno mas eficiente. Elmar tin un luna caba ta traha cu dos ekipo di trabou haciendo instalacionnan. A cuminsa den bario di Noord, pero ta programa pa bay na diferente otro punto di e isla. E instalacionnan aki ta adicional na e 1.000 luznan cu ya caba a instala durante ultimo dos aña.

Como cu Gobierno ta e cliente den e proyecto aki, ta importante pa Elmar mantene nan na altura di con ta bayendo y kico ta e proximo stapnan. E plan ta pa entre awo y fin di 2017 cambia 9.000 punto di lus existente pa LED y ta  instala 3.000 punto nobo den e bisindarionan cu mas mester di dje.

Manera anuncia, e proyecto aki ta ‘Budget Neutral’ loke ta nifica cu Gobierno no ta hincando recursonan extra, pero ta tuma loke ta spaar den e consumo danki na e LED, pa pone puntonan extra rond Aruba cu ta hopi necesario den varios bario rond di e isla. Dor di ta briya mas potente, nan ta brinda un mayor siguridad tanto na auto riba caminda, como hende.

Adicional na e luznan Smart LED, tambe ta instalando e 'Smart Meters' cu ta nifica un aporte grandi na e operacion di Elmar, pero pa e propio consumidor tambe. “Den futuro lo ta asina cu via di un App of website, e cliente por djis log in y wak e informacion di su consumo personal,” segun Tromp. Esaki lo yuda e consumidor na midi con hopi y na kico e ta gasta coriente na su cas.

Tambe ora un luz ta faya, e ciudadano no mester yama Elmar mas pa avisa, paso automaticamente e sensor ta manda un notificacion pa central y esaki ta dirigi un ekipo di tecnico cu ya sa caba kico ta e problema y kico pa haci.

Tabata un presentacion hopi interesante pa Ministernan caminda nan por a compronde mas di e tecnologia avansa aki, kico ta e posibilidadnan y loke e ta nifica pa mehoracion di servicio na e ciudadano comun y na e operacion di Elmar como compania di utilidad di Gobierno.

Expresionnan haci den e articulo aki no necesariamente ta refleha opinion di ArenaPoliti.co