Loke ta bon pa Aruba, ta bon pa nos tur! 

Ta masha lamentabel cu e debate publico si mester permiti mas hotel "all inclusive"  of no, a yega na un confrontacion di interesnan particular contra e interes di nos tur. E debate ta bay entre e interes di algun hotel cu kier tin e posibilidad di bende nan propiedad na e prijs mas halto posibel y pesey kier keda cu e posibilidad di bay 100% "all inclusive"  y na otro banda e interes di resto di nos comunidad cu tambe ta depende di nan trabou y nan entrada di e turistanan cu ta bin Aruba.  E pregunta central di e debate ta, si por sigui laga e cantidad di hotel crece, cu ta ricibi turistanan y purba tene nan den nan hotelnan so y limita e necesidad di e turista pa conoce y disfruta di resto di nos isla y tur loke tin di ofrece na experiencia, cuminda, cultura, naturalesa, negoshi, etc. E punto di bista di tur esnan cu ta traha of tin nan negoshi pafor di e hotelnan, ta cu mester stop e cantidad di hotelnan "all inclusive". E motibo ta cu mas hotel "all inclusive" ta nifica cu resto di Aruba ta beneficia menos y menos di turistanan, pasobra mas y mas nan lo keda den e hotelnan  y riba beachnan so. Pa resto di nos pais, e interes di e hotalnan no por bay a costo di e interes di resto di comunidad. E interes di tur e trahadornan pafo di e hotelnan di "all inclusive", restaurantnan y nan trahadornan, taxistanan, busnan di tour, huurdonan di auto, negoshinan chikito, importadornan y un sin fin di otro hende y negoshi cu ta haya nan entrada di turismo, tambe mester wordo sigura. Pasobra nos tur ta biba di turismo. Ora gobierno y otro instancianan haci propaganda pa turistanan bin Aruba, nan ta haci propaganda pa henter Aruba. Nan ta ofrece Aruba como experiencia. Pasobra ta esey ta atrae e turista! Anto ora e turista bin Aruba, e intencion mester ta pa tur hende, tur compania, tur restaurant, taxita, importador, negoshi, etc. tambe haya oportunidad pa bende e turista nan parti di e experiencia Arubiano. Hotelnan so, ni con grandi, bunita, luhoso cu nan ta, no por duna e experiencia Arubiano nan so. Ta hunto nos ta haci'e. Pesey nos tur mester beneficia di e turismo tambe.
Rene Herde': "E interes di nos tur ta mas grandi cu e interes di algun hotel so. E hotelnan grandi y bunita ta essencial pa loke Aruba ta ofrece. Sin nan e experiencia ta incompleto. Pero sin nos tur, e experiencia ta mucho mas incompleto. Ta hunto nos ta ofrece e experiencia singular cu ta Aruba".

Expresionnan haci den e articulo aki no necesariamente ta refleha opinion di ArenaPoliti.co