Andin Bikker, Lider di Partido Democracia Real  a bisa den rueda di prensa cu den casi ocho aña di gobernacion di Gabinete Mike Eman, ainda no tin un solucion pa e dump.

Bikker a bisa cu el a tuma nota cu un grupo di bisiña di Parkietenbos, recientemente y cu nan razon, atrobe a  expresa cu nan no ta mira ningun solucion, pa e situacion cu tin aworaki na dump. El a bisa cu tin areanan contamina, candela cu e mes ta wak for di su cas, huma ta bay halto, tin cantidad di mosca, establecimentonan of negoshi den e bario ta cambia di doño pasobra nan no por opera den un bario yena cu mosca y mal holo.

Segun Andin Bikker, esaki ta pasobra gobierno di AVP no tin vision y ainda no por hiba un maneho di reciclahe di desperdicio, ni di e sushi cu tur dia nos pueblo y comercio ta produci y confronta cune como pais. Su critica ta pa Minister Sevinger despues di tanto proyecto cu tabata tin relaciona cu e situacion menciona, cu a keda na storianan bunita. Segun e parlamentario esaki ta mescos cu e casnan social cu den drentando ocho aña di gobernacion e minister no a traha ni un cas social aunke e ta parti tereno SI na personanan ayega na gobierno.

Bikker a splica cu gobierno a bay campaña na 2009 bisando cu nan tin un solucion pa Parkietenbos, y a presenta yen di proyecto bunita na Parlamento, pero te dia di awe no por a busca un solucion pa e dump. Pesey cu nan razon e habitantenan di Parkietenbos y vecindario ta keha y reclama pasobra hopi promesa a wordo haci na nan, y  AVP ta den nan casi na final di nan gobernacion, y practicamente esaki ta e ultimo aña parlamentario di e gabinete aki, programa segun nos Constitucion, y por constata cu e gobierno aki a gaña pueblo cu asunto di dump y por lo pronto PDR no ta mira cu tin solucion tampoco y e ta haya cu pueblo, pa loke ta trata e tema aki, no por deposita nan voto den AVP.

Expresionnan haci den e articulo aki no necesariamente ta refleha opinion di ArenaPoliti.co