Dia 13 di september 2016 Gobernador di Aruba sr. Fredis Refunjol a duna un discurso den Parlamento na inicio di aña Parlamentario 2016-2017. Gobernador Refunjol a elabora riba e maneho di Gabinete Mike Eman II pa e aña nos dilanti, y tambe a referi na e maneho di e aña nos tras. E contenido di e discurso ta wordo determina door di Gobierno di Aruba (Gabinete Mike Eman II). Klik play pa scucha e discurso.

Discurso di Gobernador di Aruba sr. Fredis Refunjol:

“Señor Presidente,

Propio di cada comienso ta e hecho cu nan ta contene un nucleo genuino di optimismo, fé y speranza. E sentimiento aki no ta simplemente basa riba e confianza cu mañan lo ta mihor cu awe, pero e ta basa riba un compromiso pa hasi mañan mihor cu awe.

Cu e mesun sentimiento aki, mi tin e honor di efectua awemainta apertura di e Aña Parlamentario 2016-2017, marcando inicio di un etapa nobo unda prosperidad y oportunidadnan economico lo wordo traduci un biaha mas den bienestar pa tur esnan cu ta biba riba nos isla. Pami e ta un honor y privilegio di por ta presente pa di 30 biaha na apertura di Aña Parlamentario.

Mescos cu awe – unda conforme nos Constitucion nos a conveni pa habri e aña parlamentario nobo – Gobierno a logra cuminsa e trayecto di e presupuesto pa aña 2017 den e terminonan constitucionalmente prescribi. Esfuerzonan grandi a ser desplega pa asina elimina e acumulacion di atrasonan administrativo. Tur aña presupesto, raportahenan y cuentanan anual lo wordo entrega dentro fechanan stipula pa ley.

E aña aki Gobierno di Aruba a presenta un presupuesto cu un deficit di 0.5% di GDP conforme e normanan di ley di supervision financiero temporario. Esaki ta un resultado cu a wordo alcansa cu hopi esfuerzo y riba propio forsa. Presupuesto 2017 no conoce aumento di tarifa di impuesto y ta fiha e prome paso pa un reduccion di debe di pais Aruba. E logro aki a wordo hasi posible danki na un maneho financiero balansa y sin ningun ayudo financiero externo.

Despues di varios aña di a buska un operador pa e refineria na Aruba, nos por bisa awe cu hopi satisfaccion cu reapertura di e refineria ta practicamente un hecho. Dentro di poco Parlamento di Aruba lo trata e proyecto di ley cu lo hasi e reapertura di e refineria un realidad, dunando un empuhe na nos economia, nos forza laboral, nos divisanan y tambe finanza publico.

Pa prome biaha den mas cu 90 aña, Pais Aruba lo ta propietario di e refineria, mientras cu CITGO lo opera e instalacionan. E diligencia y perseverancia di Gobierno y su ekipo, consistiendo di expertonan local y internacional, tabata clave pa haña un partner cu por a cumpli na rekisitonan socio-economico, como tambe medio-ambiental cu a fiha pa opera un refineria na Aruba awendia.


Señor Presidente,

For di nos faro “California” na Hudishibana – e punta mas noord di nos isla – te cu e punta di mas oost na Seroe Colorado e compromiso pa hasi mañan mihor cu awe ta visible. E programanan pa revitalisacion di nos centronan di ciudad, como tambe mehoracion di barionan ta continuamente den ehecucion. Cu un aumento di uso di energia renobable, modernisacion di nos infrastructura y servicio publico, Gobierno di Aruba a duna prioridad na mehora y renoba calidad di biba na Aruba y habriendo tur dia mas avenida den direccion di sostenibilidad.

Na inicio di añanan ochenta di siglo pasa, nos infrastructura tabata suficiente pa por sostene e desaroyo economico cu a opta p’e e tempo ey. Den un lapso di 30 aña nos poblacion a redobla y e actividadnan economico a multiplica. Sinemargo, e nivel di nos infrastructura y accesibilidad di areanan publico no a mehora den e mesun grado y a forma un presion grandi riba nos sociedad.

E aña aki lo entrega e Green Corridor y inicio di Watty Vos Boulevard - proyectonan cu lo hiba mobilidad riba Aruba na un otro nivel y lo aumenta productividad di infrastructura. E waf nobo di carga na Barcadera ta simbolisa un era nobo pa oportunidadnan economico den region: portanan lo habri pa e comerciante mediano y chikito, como tambe pa alianzanan strategico cu lo eleva nos isla na un nivel mas halto di desaroyo. Nos lo conoce pronto un hospital moderno y creacion di un Inspeccion di Salubridad Publico. Hunto cu inversionan pa fortelese departamentonan existente lo mehora calidad di salubridad publico y lo brinda servicionan medico conforme e exigencianan di awe y futuro.

Gobierno di Aruba ta conciente cu desaroyo socio-economico ta bay man den man cu proteccion di nos naturalesa. Gobierno a sa di mantene su mes na e tratado di Ramsar pa conservacion di Spaans Lagoen – un sitio reconoci den e tratado aki. Maneho di medio ambiente ta un di e areanan di maneho di mas compleho, pero tambe esun di mas esencial. Solucionan, desafortunadamente, no tin un efecto riba termino cortico. Como isla chikito den desaroyo, e ta pone un responsabilidad grandi riba nos gobernantenan, organisacionan no-gubernamental, gremionan y sector priva pa hunto pone schouder cu schouder pa asina yega na e balansa ideal.

E apertura di e Centro di Excelencia siguramente lo contribui na esaki. Hunto cu Nacionan Uni nos lo yuda na realisa e 17 metanan di desaroyo sostenible pa asina compila y comparti conocemento cu otro islanan chikito den desaroyo.

E reconocemento di Aruba den Reino pa su imagen ‘berde’ y su meta pa yega 100% sostenibilidad den produccion di awa y energia, ta refleha su mes den e rol prominente cu nos ta hunga riba plataformanan internacional representando Reino Hulandes.

Hunto cu e Organisacion Mundial di Turismo di Nacionan Uni, Aruba awe ta anfitrion di e Conferencia Happiness 360, dunando asina atencion na e importancia di nos hendenan pa un industria turistico sostenible.


Señor Presidente,

Prosperidad y sostenibilidad ta inalcansable si inversion den nos hendenan keda atras. Un economia basa riba conocemento ta fundamental pa yega un bienestar sostenibel pa un y tur. Mesun importante ta e formacion di miembronan di e sociedad aki pa convivi y comparti cu otro.

Tur esfuerso cu nos haci awor pa mehora y reforma tur loke ta necesario nos sistema di enseñansa, lo paga dividendo pa generacionan nos dilanti. Man den man cu educadornan, Gobierno ta creando un sistema di enseñansa cu ta reconoce y maximalisa e diversidad talentonan den nos hendenan y di cada alumno y studiante.

Den e aña cu ta cuminsa awe, lo pone atencion special tambe na formacion profesional adicional. Esaki ta rekeri inovacion y cambio den un sistema enseñansa y formacion di adulto, cu pa decadanan a sirbi nos, pero cu awor mester refleha mas e necesidadnan i e posibilidadnan di formacion di e tempo moderno y globalisa cu nos ta biba aden. Durante e ultimo aña a sigui inverti den drecha infrastructura di scolnan, como tambe mehora nos sistema educacional pa inclui mas y mas alumno y studiante, y no exclui ningun.

Dos aspecto importante di e composicion social di nos comunidad ta e practica di deporte y mantene nos cultura bibo continuamente.

E maneho integral di cultura lo salbaguardia y renoba nos herencia cultural y monumentonan historico. Lo sigui promove e sinergia entre cultura y enseñansa, y cu turismo. Den cooperacion cu sector priva, lo introduci un dimension nobo den nos actividad economico principal cu lo contribui na un mihor calidad di e producto Aruba.

Hopi ta esnan cu ta disfruta di deporte diariamente y cu ta beneficia di e oportunidadnan di desaroyo personal y social cu esaki ta ofrece, sea cu ta practica deporte como atleta activo, of como entrenador, dirigente, voluntario of como spectador.

Na e Weganan Olimpico cu a tuma lugar recientemente na Rio de Janeiro, no menos cu shete atleta di nos pais a demostra di ta dispone di e nivel pa por a cumpli cu e exigencianan di clasificacion pa e Wega nan Olimpico. E participacion di e prome representante di nos pais na Weganan Paralimpico, ta muestra cu nos sociedad ta birando cada biaha mas inclusivo. Esaki lo sirbi como motivacion pa mas persona cu un limitacion fisico pa tambe bira activo y disfruta di tur e beneficionan cu deporte por ofrece nan.


Señor presidente,

Den cooperacion estrecho cu sector empresarial y gremionan pa aumenta e participacion di mas ciudadano den nos mercado laboral. E perspectivanan pa mas empleo den nos pais ta hopi positivo pa 2017. Ta calcula cu e cifra di desempleo lo baha significantemente compara cu e cifranan di algun aña atras.

E hecho cu nos a logra e reapertura di un industria historicamente importante pa nos economia, ta duna nos mas motivacion pa sigui inverti den calidad di nos industria turistico, den e actividadnan dirigi na promove un economia di conocemento a base di tecnologianan limpi, como tambe den sector primario introduciendo incentivonan fiscal, como tambe aplicacion di inovacion, eficiencia y tecnicanan sostenible den agricultura, cria y pesca.

Banda di e refineria, lo desaroya actividadnan paralelo na e industria primario aki cu lo contribui na fortalece e posicion di Aruba como un centro di conocemento y un brug pa negoshi entre ambos continente.

Durante mas di 50 aña, nos industria turistico a demostra su abilidad pa adapta su mes na e demanda y acomoda su mes na mercadonan nobo ora cu tin mester, manera Mexico recientemente. Calidad y sostenibilidad ta keda e metanan principal di nos industria turisico. Nos aeropuerto lo sigui cu su plan di inversion pa e añanan nos dilanti y lo desaroya e waf di crucero nobo na Playa pa por sigui mehora nos posicion den un mercado sumamente competitivo. Cu aumento di cantidad di cupo aereo, como tambe e cantidad di crucero cu lo bishita nos isla, e inversionan aki lo duna nan frutonan ampliamente den comunidad.

E principio di sostenibilidad ta expande su mes riba tur tereno den maneho di Gobierno. E transformacion pa un combinacion energetico sostenible na Aruba, lo ta tema central di e di shete conferencia ‘Green Aruba’. E aña aki e maneho di energia lo efoca su mes riba mas penetracion di fuentenan solar y di biento pa produccion di energia. Hunto cu nos partnernan strategico y nos companianan di utilidad nos a cuminsa cu e proyecto di instala panelnan solar riba skolnan rond di nos isla, como tambe edificionan publico.

Pa por recupera di e crisis di 2008-2009, Gobierno di Aruba a saca un man na e ciudadano y a inverti primeramente den su poder di compra. Cu e plan di inversion den pleno ehecucion a crea cupo di trabow y a crea actividadnan economico. A introduci e reformanan necesario den nos finanza publico, a salba nos fondonan di pensioen y seguro social.

Sin embargo, Gobierno ta conciente cu parti di nos comunidad ainda ta confrontando retonan serio den bida diario. Specialmente esnan mas vulnerable. Pa un comunidad husto mester sigui pone atencion pa esnan den necesidad asina, cu instrumentonan di maneho dirigi riba trece alivio y mehoracion riba termino cortico y pa trece cambio structural a largo plazo.

Nos sociedad – specialmente nos hoben nan – ta keda obheto di influencianan indesea cu ta bin man
den man cu un economia habri y un comunidad den proceso di cambio continuo. Gobierno ta traha pa continuamente fortifica e fibranan social pa asina proteha esnan mas vulnerable y mantene nos hoben nan riba e caminda recto. E edificio multifuncional pa servicio publico den diferente distrito, lo duna un aporte importante den esaki.

Desaroyo di hubentud cu perspectiva riba un bida sano, activo y constructivo, ta rekeri un maneho integral di hubentud. E ta rekeri un coordinacion continuo entre tur instancia cu ta trata cu derechonan di mucha y hubentud. Trahando den e forma aki Gobierno di Aruba a aloca fondonan adicional pa combati abuso di mucha. Cu e introduccion di e organo Ombudsman na Aruba, lo establece tambe un ombudsman pa defende derecho di mucha.

Gobierno di Aruba ta keda asertivo pa desaroyonan di nos region. Den estrecho cooperacion cu Gobierno di Reino, nos ta sigui fortifica continuamente seguridad di nos pais pa retonan y cambionan externo na nivel internacional. E ultimo añanan a traha duro na fortifica e aparato hudicial pa asina aumenta e confianza y cooperacion entre diferente institucionan tanto local como internacional. Motivacion di personal den e departamentonan cu ta percura pa orden ta keda esencial pa sigui optimalisa nos sistema hudicial pa garantisa seguridad di nos tur y nos bishitantenan.


Señor Presidente,

Tanto Gobierno como Parlamento tin e obligacion pa traha activamente pa mehoracion di nos sociedad den tur area y den tur forma posibel. Durante di e proceso aki nos mester demostra nos stabilidad y continuidad, pero tambe nos capacidad pa adapta y renoba segun necesidad di nos sociedad. Como representantenan di henter comunidad ta boso tarea, pa activamente busca e balansa entre continuidad y renobacion, entre desaroyo economico y mehoracion di calidad di bida den e forma mas amplio posible.

Parlamento y Gobierno t’ey pa sirbi bienestar general, conciente di cu interes general no ta igual na tur e interesnan particular. Discusion publico habri, di temanan importante pa nos comunidad, ta un elemento esencial pa un democracia bibo. Sinembargo nos tin e obligacion pa percura cu diferencianan di opinion no comberti den division di pueblo.

E ta e tarea di lidernan politico, empresarial, social, religioso, sindical y profesional, pa duna e ehempel di con ta discuti temanan importante pa nos comunidad, den un forma racional, sin ofensanan personal of uso di instrumentonan destructivo of descriminatorio. Opinionan diverso, aceptacion di desicionnan democratico a base di debate y dialogo ta esencial pa un estado di derecho. Gobierno di Aruba ta sigui fortifica organonan constitucional. Gobierno ta stipula regla y ta ehecuta esakinan pa matene orden publico y seguridad riba nos pais. Gobierno tin un tarea ehemplar den cumplimento cu e normanan aki pa asina garantisa integridad di aparato gubernamental.

E tarea formula den e relato anual di Banco Central di aña 2009 tabata hopi specifico y a rekeri esfuerzonan grandi. Durante di e ultimo añanan a logra cumpli cu tur esakinan sin causa desekilibrio economico, laboral of social. Analisis di Banco Central ta mustra cu confiansa di consumidor ya caba ta aumentando.


Cu e mesun sentimento genuino di positivismo, fe y speranza cu ta caracterisa e compromiso pa hasi mañan mihor cu awe, como representante di Su Mahestad Rey Willem-Alexander y como cabez di gobierno di Aruba, mi ta declara, manera nos Constitucion ta prescribi, e aña parlamentario 2016-2017 pa habri.

Mi ta pidi Dios Todopoderoso ilumina cada un di nos y guia nos pa nos por sigui eherce nos trabow y hiba nos isla pa dilanti.”

Expresionnan haci den e articulo aki no necesariamente ta refleha opinion di ArenaPoliti.co