Arthur Vallejo (MEP): Nos mester cambia di sistema curativo pa sistema preventivo
Den cuido di salud
STA CRUZ -- Dialuna mainta trempan lider di partido MEP Evelyn Wever-Croes a lansa e candidato nobo dr. Arthur Vallejo Jr. pa e lista di MEP. Durante su discurso Arthur Vallejo a duna di conose cu e ta haya esaki un dia hopi emocionante, y tin hopi interes pa yuda mehora cuido di salud den nos pais.
Un di e puntonan cu ela' enfoca riba dje ta e sistema di salud na Aruba, cu ta un sistema mas curativo, pero pa mehora cuido di salud di bo pueblo, bo mester enfoca mas riba e cuido preventivo.
"Cu cuido preventivo bo por scapa hopi placa cu awor ta wordo aloca pa hendenan cu ya ta sufri di un enfermedad cronico. Si nos hasi mas pre-screening of aplica e sistema preventivo mas biaha, nos ta evita hopi mas enfermedad y dolor.
MEDICONAN GRADUA DEN REGION
E mediconan gradua den nos region ta forma un parti importante nos vision. Aruba mester di nan, nos mester di nan. Nan por hunga un papel clave pa yuda nos mehora nos cuido di salud. Na e mediconan cu a studia den region y nan famianan y e 11 mil firmantenan mi kier garantisa cu awor si nos ta bai resolve e problema aki.
Cu e cambio di e sistema di curativo pa preventivo, y cu nos yiunan di tera gradua den e region nos lo por alivia e sobre carga cu tin den medicina awor.
Esaki ta un oportunidad grandi cu Aruba tin awor, pa etala e cambio di rumbo y cambio di vision, enfoca mas riba cuido preventivo", dr. Arthur Vallejo Jr a finalisa.
Expresionnan haci den e articulo aki no necesariamente ta refleha opinion di ArenaPoliti.co