Evelyn Wever-Croes (MEP): Fraccion MEP a entrega mocion pa evita aumento di schoolgeld y sondea posibilidad pa enseñansa basico gratis
![Evelyn02](/images/779x490/Evelyn02.jpg)
Manera ta conoci diaranson ultimo parlamento di Aruba a trata e aumento di schoolgeld di SKOA en combinacion cu suspencion di docente. Den un comunicado anterior nos a informa cu 2 mocion a wordo entrega relaciona cu e caso di docente. Pa loke ta trata e tema di schoolgeld mes fraccion MEP a hasi entrega di dos mocion pero tambe a entrega un mocion relaciona cu e maneho deficiente di Minister di Enseñansa.
Fraccion a tuma su tempo y mester a tene cuenta cu tur e hecho y circumstancianan relaciona cu e aumento di schoolgeld. A base di esaki a dicidi di entrega un mocion urgiendo Minister di Enseñansa pa paga e debe cu gobierno tin na SKOA mas pronto cu ta posibel, y yega na un areglo cu SKOA pa evita aumento di schoolgeld, y den caso cu ta necesario, aserca parlamento pa parlamento aproba alocacion for di otro fondonan.
Ademas di esaki e derecho universal di e mucha tambe fraccion a tene consideracion cune. E ta di lamenta cu placa y un aumento drastico di schoolgeld mester bai hunga un rol unda cu e mucha por wordo limita di su educacion. Den cuadro di esaki nos fraccion a entrega un otro mocion instruyendo e minister di enseñansa pa hasi e estudionan necesario pa por implementa enseñansa gratis y bin despues informa parlamento di esaki.
Fraccion di MEP a haye sumamente necesario pa presenta e mocionan aki mirando cu mester tene consideracion cu derecho di mucha pero tambe finansas di cada un famia pasobra e aumento di 75 florin pa 250 florin (333.33%) ta uno drastico y inhusto.
![mocion mep 1 april 2015 debeskoa](/images/imagen/mocion-mep-1-april-2015-debeskoa.jpg)
![mocion mep 1 april 2015 ensenansagratis](/images/imagen/mocion-mep-1-april-2015-ensenansagratis.jpg)
Expresionnan haci den e articulo aki no necesariamente ta refleha opinion di ArenaPoliti.co