ORANJESTAD - Debatenan den Parlamento den ultimo anjanan practicamente semper tabata di un nivel masha masha abou mes. Sinembargo e debate den Parlamento di diaranson ultimo cu e minister di ensenjansa a sorprende un y tur. Parlamentarionan na un forma professional a sa di trese nan puntonan padilanti. Algun hopi critico, otronan menos critico, pero riba un nivel di respet.
Te ora cu Desiree Croes a cuminsa tira cu lodo y a cuminsa ataca lider di fraccion di MEP na forma baho y personal. Por a nota cu esnan den tribuna mesora a desaproba e comportacion di Desiree Croes, cu obviamente kier a danja e nivel di e reunion.
Mester duna credito na lider di fraccion di MEP Evelyn Wever-Croes cu NO a cai den e trampa ey, y a sa di pone un paro mesora na e comportacion bergonsoso di Desiree Croes. Evelyn Wever-Croes no a cai den trampa pa bai ataca Desiree personal tambe, y a pidi Desiree pa keda na e punto di agenda, cu e reunion no ta tocante Evelyn, sino tocante con nan por garantisa bienestar di studiantenan y maestronan den ensenjansa. Ainda Desiree a purba di saca Evelyn di su balance, y yam'e pa SANTA EVELYN, algo cu tambe a cai den masha mal tera pa mira con Desiree ta chercha cu religion catolico.
Mester duna Cesar loke ta di Cesar y e forma con Evelyn a para Desiree y a bira y hiba e reunion bek na e nivel cu e tabata, tabata sublime. Evelyn no a importa cu e ta wordo ataca personalmente, e kier a sigi debati riba e tema di agenda: ensenjansa.
Te ainda ta masha poco tabata e biahanan cu Evelyn a sa di mantene su mes asina trankil durante cu e ta wordo ataca personalmente, sinembargo por nota un cambio y mas dominio propio den su persona.
Desiree Croes a para bira e berguensa di Parlamento pa su comportacion. E ta duna e mal ehempel na hobennan y no ta un inspiracion pa demas hende muhernan tampoco. Ohala cu esaki sirbi di senjal pa Desiree Croes realisa cu tira cu lodo no ta un opcion mas den Parlamento, cu Aruba ta cansa di politica di riool y kier mira e organo mas halto di nos Constitucion comporta su mes na e nivel ey.

Expresionnan haci den e articulo aki no necesariamente ta refleha opinion di ArenaPoliti.co