ORANJESTAD – Durante su presencia na Panama, Prome Minister Mike Eman a haci un bishita di trabou na e Zona Liber di Colón caminda e distribuidornan mas grandi ta ubica. Aki el a combersa cu e dirigentenan di empresanan importante den e industria di paña y acesorio pa kende nos mandatario a haci un presentacion y invitacion pa establece nan mes comercialmente riba nos isla. “Esaki ta forma parti di e compromiso cu nos a haci cu nos pueblo y nos pais pa nos por duna nos centro di ciudad bek e realce cu e tabatin hopi aña pasa y poco poco esey ta wordo realisa tambe,” asina Minister President Eman a bisa na final di e encuentronan.

Ta trata di empresarionan cu tin licencia pa benta y distribucion di marcanan grandi y conoci manera Levi’s, Dockers y US Polo, entre otro pa loke ta e region di Centro, Latinoamerica, pero tambe Caribe. Hunto e companianan International Apparel Corporation S.A. y ESMO International ta representa riba 51 marca di paña y sapato, algun di nan ta presente na Aruba caba, mientras cu hopi otro no.

Esnan cu tey caba mes, no ta conta cu un flagship store cu lo ta sumamente atractivo pa Caya Principal. Den investigacion cu gobierno a haci, a saca afo cu mayoria di esnan cu autorisacion pa haci esaki ta e companianan na Panama. Probechando e biaha en conexion cu Cumbre de las Americas y mision comercial maritimo/logistico, Prome Minister a acerca e companianan aki.

“Nos kier stimula y atrae nan pa bin habri tienda na Aruba; sigur nan lo yuda den duna nos caya grandi un realce,” asina Minister President Eman a bisa splicando cu e tiendanan aki ta hala publico, pero na mesun momento tin prijs cu ta atractivo pa nos consumidornan local. Banda di e tiendanan, Gabinete Mike Eman II ta fomenta pa negoshinan di horeca habri den Caya Principal paso esey ta aporta na e creacion di un ambiente dinamico cu ta impacta den forma economico, pero tambe social.

Revitalisacion di centro di ciudad no ta limita na su infrastructura, pero tambe su variedad di oferta. Gobierno ta trahando riba un renobacion integral pesey ta traha hunto cu sector priva riba e promocion di inversion. “Nos ta percura cu unda nos por yega, tin e forsa di convocacion pa invita inversionistanan, nos ta haci tur nos esfuerso,” asina Premier Eman a indica. Den e caso di Panama, e bon reputacion di nos pais ya ta existente. “Nos a haya reaccion positivo, nan conoce y tin simpatia pa Aruba.”

Expresionnan haci den e articulo aki no necesariamente ta refleha opinion di ArenaPoliti.co