ORANJESTAD - “Mi no por imaginami un miho comienzo di mi viahe den Caribe cu Aruba. Mi tabata tin reunionnan masha ameno mes cu hendenan cu a duna un bon impresion di loke Aruba kier logra den e region aki. Como Minister di Asuntonan Exterior mi ta tuma e ambicion duradero aki den mi maneho.”

Minister Albert "Bert" Koenders, tabata 24 ora na Aruba y a haci hopi den e periodo cortico na Aruba. El a reuni cu entre otro cu Gobernador Sr. Fredis Refunjol, Presidente di Parlamento di Aruba Sra. Marisol Lopez-Tromp, ministernan, representantenan di sector comercial y otro institutonan di Aruba. “Mi a bin pa scucha di e importancia di relacionnan exterior pa Aruba. Mi ta minister di Reino a base di igualdad y respet.” Koenders a bisa di ta al tanto di e cantidad grandi di desaroyonan positivo den e region aki. “Bon relacion ta hopi importante pa e oportunidadnan pa Aruba y Reino.”

E minister ta busca un cooperacion den Reino pa asina logra un asiento den Conseho di Seguridad di Nacionnan Uni. “Nos ta consiente di e problematica di paisnan chikito y e retonan cu nan tin riba topiconan  ecologico y maneho di awa. Nos ta duna hopi importancia na stabilidad y seguridad den e region aki y nos ta pone nos mes pa temanan paz, husticia y desaroyo. Di e manera ey Reino kier profila su mes cu e motto: ‘One Kingdom, Four Countries, Europe and the Caribbean’.”

Coperacion economico ta hunga un rol grandi den maneho di asuntonan internacional. “Aruba ta pone importancia riba durabilidad y ta importante pa Relacionnan Exterior uza su instrumento y embahadanan disponibel pa sostene Aruba den esaki. Den e mundo cu ta bira dia pa dia mas grandi, nos mester di otro.”

Expresionnan haci den e articulo aki no necesariamente ta refleha opinion di ArenaPoliti.co