Minister Otmar Oduber comentando riba e final di e impasse cu tabatin entre su persona y Gabinete Mike Eman II a duna di conoce cu despues di e varios reunion y retreat cu a tuma lugar cu su coleganan Minister y miembronan di Fraccion di AVP den Parlamento, a fiha un base di respet y confianza cu mester sigura ehecucion di metanan na interes general.
El a bisa cu tur e preocupacionnan cu el a presenta ta valido y a haya e atencion necesario unda cu a yega na palabracionnan riba cada un di nan y inclusive, otronan presenta pa su coleganan lo haya e atencion necesario tambe, mientras cu a delinea plannan di accion pa algun di e puntonan caba.
Algun ehempel di e puntonan cu lo ta hayando atencion ta entre otro e aspecto di seguridad cu ta afecta tanto habitantenan di Aruba como sector turistico. Aunke te ainda Aruba ta conoci como un destinacion relativamente sigur, tin un tendencia di ultimo temponan cu criminalidad ta aumentando. Prome cu esaki en berdad trece consecuencianan serio pa nos comunidad y nos bishitantenan, medidanan urgente mester wordo tuma pa evita cu nos isla haya su mes den un situacion similar na algun otro isla den Caribe unda criminalidad a caba cu turismo.
Minister Oduber a expresa cu turismo ta e pilar economico principal di Aruba y despues di ciere di refineria a sa di carga nos economia pa e ultimo 6 aña. Teniendo na cuenta esaki mester bisa cu  turismo y otro terenonan di maneho lo mester sostene y complementa otro pa asina logra e sinergia necesario y saca maximo rendimiento for di turismo.  
Den e cuadro aki a yega na palabracionnan cu ta importante pa yega na ehecusion di e Beach Policy cu lo reglamenta e uzo di e area di beach pa e diferente partidonan y lo regula e desorden existente na e momentonan aki na beneficio di tur usuario. Mescos ta conta pa implementacion a corto plazo e cambio di ley pa regula e fenomeno di “All Inclusive” pa evita efectonan negativo pa cu turismo y economia. E parti di otorgamento di tereno y permiso na desaroyadornan pa construccion di hotel, apartamento of condominio tambe a haya e atencion debido y a yega na palabracionnan concreto pa evita un efecto negativo riba maneho di turismo.
Un otro punto di importancia presenta pa Minister Oduber y cu a yega na acuerdo riba dje ta pa atende cu e acuerdonan yega na nan cu e diferente gremionan, acuerdonan cu ta na beneficio di bienestar general di nos pais.
Minister Oduber a indica cu e ta sinti despues di e reunionnan cu a tuma lugar cu tur colega ta riba e mesun liña, a reconfirma como profesionalnan cu tin un meta cu tin cu caba di cumpli cu ne y conhuntamente lo traha riba e accionnan cu mester tuma luga na bienestar di nos comunidad.

Expresionnan haci den e articulo aki no necesariamente ta refleha opinion di ArenaPoliti.co