Durante di e ultimo Conferencia di Prensa di e fraccion di AVP den Parlamento pa 2016, e lider di fraccion Marlon Sneek y Rene Herde', a repasa e tema, debate y logronan mas importante di aña 2016. Tambe nan a wak dilanti pa wak kico 2017 ta bay trece pa Aruba. Rene Herde': "Sin duda e tabata un aña exitante. Aruba a haci adelantonan grandi y importante netamente riba e tema y areanan cu ta asina crucial pa futuro: economia, finansa publico, seguridad social, labor, infrastructura y enseñansa. Riba tur e terenonan aki nos a conoce cambionan grandi of preparacion pa cambionan grandi cu nos lo wak cristalisa den 2017. Pero sin mas loke mas a domina e aña aki den politica y cu lo tin un impacto grandi den otro aña y añanan despues, ta e reapertura di e refineria na San Nicolas. E tabata un meta cu hopi a pensa cu ta imposibel. Pa otronan den oposicion e tabata un tema pa haci politica cun'e. Pa AVP e tabata un reto cu nos a logra concretisa den acuerdonan cu ta fortifica nos economia, crea cupo di trabou y duna entrada desea na famia y gobierno." Pa Aruba e tabata e tema mas importante di e aña!

TURISMO
Turismo ta keda e pilar principal di Aruba y lo sigui haya tur atencion cu e merece. E aña aki debatenan den turismo a concentra riba introduccion di reglanan pa controla e crecemento di "all inclusive". Rene Herde':" E debate tabata hopi publico y cu un participacion grandi di hopi sector di nos comunidad. Esey ta bon, pasobra ta trata di un tema cu di un forma of otro ta afecta nos tur. E resultado di e debate tabata cu a yega na un areglo cu ta permiti hotelnan pa opera parti di nan hotel como "all inclusive", sin cu a laga cos bay for di man y permiti un exceso di "all inclusive" cu no lo tabata bon pa Aruba. Den e debate aki interes di Aruba a prevalece!"

2017
Segun Sneek y Herde' e aña 2017 ta priminti di bira uno ainda mas interesante, pasobra tin asina hopi tema y proyecto den preparacion cu ta bay concretisa den 2017. Pa prome tin e refineria cu ta bay cuminsa tuma hende na trabou pa e prome fase di haci limpi y drecha e refineria pa e por opera bon y cu gas. Banda di esaki tin proyectonan manera e "Green Corridor" cu ta bay keda cla y cu lo enrikese henter e area pariba di brug. Bo tin scolnan cu ta bou renobacion y e scol nobo Princes Amalia cu ta bay keda cla. Tin e renobacion di e dump y e asignacion oficial di e areanan asigna specialmente pa cuido di naturalesa. E hospital nobo ta bay bini cla gradualmente y lo wordo tuma den operasion. E sistema nobo di salario di maestronan di scol ta bay wordo trata den Parlamento y e ley pa prohibi saconan di plastiek ta drenta na vigor. Anto esey ta djis parti di tur loke ta bay wordo haci na 2017. C

Sinembargo, conciente di tur loke falta pa haci, AVP ta sigui bisa "ainda falta".

Expresionnan haci den e articulo aki no necesariamente ta refleha opinion di ArenaPoliti.co