Ta buscando otro confrontacion?  

ORANJESTAD – Lider di MEP Evelyn Wever-Croes durante conferencia di prensa di MEP tabata bastante critico riba e mal maneho financiero di e gobierno aki. 
“Mike Eman no ta sinja su les. Ni despues di KB, ni despues di si welga di hamber, ainda e no por asumi su responsabilidad y manda e presupuesto na ora Parlamento. Nos a ricibi un concepto preliminario di e presupuesto 2016, pero esun definitivo cu mester a yega Parlamento dia 1 di September, no a yega ainda. E conseho di CAFT riba dje tampoco y tampoco Raad van Advies. 
Ami no ta compronde dicon Mike Eman ta firma un protocol den cual e ta priminti cielo y tera, despues e ta bin parlamento pa defende un ley di CAFT den cual e ta mara su mes na man cu pia, y despues toch e ta keda sin cumpli cun’e. 
Un persona cu no por tene su palabra, un persona cu no ta cumpli cu su propio palabracion y ley, ta con bo por confia un persona asina? 
Mientras tanto nan ta sigi aumenta e debe nacional, nan ta sigi malgasta placa na green conference y biahamento, y pueblo ta sufri debi na e mal maneho. 
E situacion aki no ta sano pa nos pais, y e no ta husto pa nos pueblo. Ningun hende no sa mas kiko ta bai pasa y asina inversionistanan no ta bin nos pais mas tampoco. 
Mi ta spera cu e donjonan di AVP papia cu Mike Eman si, pasobra tur cos ta mustra cu e ta buscando un otro confrontacion cu Hulanda, y si esey pasa, mi ta spera cu e donjonan di AVP percura pa e no bolbe bergonsa nos pais cu welga di hamber y bai yora na television nacional. Pasobra e berguensa cu el’a pone henter pueblo pasa, ainda nos no a lubid’e. Ta danki na e comportacion bergonsoso aki, den Tweede Kamer nan no tin ningun respet mas pa Aruba”, segun lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co