Pero no a hasi nada! 

ORANJESTAD -- Un biaha mas pueblo por a mira e nivel baho di Parlamento, na momento cu ta trata criminalidad, e parlamentarionan di AVP a cuminsa ataca lider di MEP Evelyn Wever-Croes tocante famia atrobe. 

"MI a scucha hopi atake contra mi persona pa cosnan cu mi famia lo a hasi. Lagami bisa esaki bon cla: mi ta stima mi famia, pero ora un hasi malo, e mester carga su consequencianan. 

Berdad e minister di labor di AVP ta mi primo, y como persona ta duel mi locual e y su famia ta pasando aden. Pero ami a alerte. Ami tabata sa di e corupcion aki desde 2015, y mi a hala su atencion. Mi a consehe pa para e corupcion aki, y ademas mi a recorde cu e ta un CROES riba lista di AVP y nos tur sa cu un CROES riba lista di AVP ta wordo sacrifica. Kiermeen ami a alerte. 

Pero kiko boso a hasi? Pasobra boso tambe tabata sa di basta tempo. Boso mes a comenta esey akiden. Kiko abo a hasi ora bo a haya sa di e escandalo aki basta tempo pasa? Bo a sinta keto. Bo no a hasi nada. Esey ta hasi abo complice. 

Anto abo tin e curashi di bin cuestiona ami cu mi famianan?

Lagami pone esaki bon cla un biaha mas. Tur hende cu comete eror mester sinta riba su propio blaar, esey ta conta pa mi famianan tambe. Asina ami a lanta mi yiunan y asina ami ta trata TUR hende.

Si e unico cos cu boso por hasi akiden ta lastra famia di otro hende, ta demostra un biaha mas cu boso no tin argumento mas, y cu e stempelparlement aki mester caba, y cu nos mester bin cu leynan pa caba cu e stempelparlement aki. Sigiente biaha cu bo kier ataca ami cu algo di mi famia, pensa prome kiko ABO a hasi ora bo a wordo poni na altura di e corupcion aki" lider di MEP Evelyn Wever-Croes a contesta e parlamentarionan di AVP.

Expresionnan haci den e articulo aki no necesariamente ta refleha opinion di ArenaPoliti.co