Perspectiva Independiente without background 001

Luz Berde pa Geel cu Blauw?

(Tempo pa lesa: 3 - 6 minuut)
green lightNo mas cu shete minister. Castigo minimo pa pedofiel. Drones, radar y helicopter pa vigila nos costanan. Ampliacion di e canasta basico. Elimina impuesto riba pensioen di biehes. Evalua legalisacion di uso medicinal di cannabis. Esakinan ta algun di varios punto cu partidonan MEP y POR tin en comun. Banda di tin basta en comun pa loke ta trata proposicionnan, e cantidad di acusacionnan di MEP contra e lider di POR, sr. Otmar Oduber, a baha drasticamente durante tempo di campaña. Esaki a mustra di a aumenta e posibilidad di un coalicion entre e dos partidonan aki. Y cu tanto MEP y POR expresando di no lo forma un coalicion cu AVP, lider di AVP sr. Mike Eman a keda practicamente obliga di ‘duna’ MEP y POR e luz berde y tur espacio pa forma un coalicion.

Confianza  
No a tuma mucho tempo despues di eleccion pa e relacion anterior entre MEP y sr. Otmar Oduber haya antencion. Por ehempel, e dianan despues di eleccion por a nota den e estadisticanan di ArenaPoliti.co cu un articulo di 2016 di MEP entregando un keho contra sr. Oduber a wordo habri miles di biaha. Esnan cu ta corda varios reunion publico den cual ex-minister Oduber mester a contesta preguntanan, tambe lo corda cu ‘confianza’ lo ta un di e ultimo palabranan cu ta(wata) describi e relacion entre MEP y sr. Oduber. 
Con MEP por forma un gabinete cu credibilidad trahando cu un ex-minister cu nan a purba convence Pueblo cu no ta di confia y no ta integro? Imposibel? No.”

Mientrastanto nos tin un resultado di eleccion cu na e momentonan aki ta mustra den direccion di tres opcion principal como proximo gobierno: un coalicion di MEP y POR, un coalicion di MEP, POR y ReD, of un zakenkabinet. Un zakenkabinet ta un posibilidad serio, pero MEP y POR a base di nan mayoria den asiento (no den voto) tin e derecho di forma un gabinete politico y a expresa di kier haci e intento pa forma un gabinete politico. Pero con bo ta forma un coalicion si tin un falta di confianza den integridad? Con MEP por forma un gabinete cu credibilidad trahando cu un ex-minister cu nan a purba convence Pueblo cu no ta di confia y no ta integro? Imposibel? No.

Crediblidad 
Nos tin cu tene na cuenta cu e necesidad di crea un proximo gobierno pa Aruba ta surpasa interesnan partidista. Asientonan no ta bin sin responsabilidad. Naturalmente un zakenkabinet ta keda un opcion. Pero considerando e desaroyonan actual, ta mustra cu ‘Plan A’ pa MEP ta un coalicion hunto cu POR y ReD. Pues enfocando riba con MEP por tin credibilidad formando un coalicion cu un partido di cual su lider como minister no (tawata) tin confianza di MEP, por wak un solucion den exigi leynan cu ta percura pa hopi mas transparencia y responsabilisacion den gobernacion. Tambe un cambio den e ley di destaho publico y depolitisacion di nombramentonan laboral. Leynan cu por wordo aproba durante ‘e prome 100 dia’ di gobernacion mientras cu por traha segun e principionan di e leynan aki desde prome dia di gobernacion. Lo mester trata di un mehoracion serio y drastico den transparencia gubernamental y no ‘transparencia conveniente’
Leynan cu por wordo aproba durante ‘e prome 100 dia’ di gobernacion mientras cu por traha segun e principionan di e leynan aki desde prome dia di gobernacion.”

Hefe di Gobierno 

E fraccionnan den Parlamento sosteniendo e coalicion, incluyendo e presidente di Parlamento, lo mester eherce e trabou di controla gobierno den un forma serio pa e gobierno di coalicion por tin credibilidad. E weganan di (keda sin) yama reunionan publico ora ta cumbini gobierno y frustra nos democracia parlamentario mester keda den pasado. 
Como oposicion fraccion di MEP, y tambe sr. Andin Bikker, no tawata tin e poder pa exigi mas responsabilisacion di ministernan cu no ta contesta tur pregunta of duna tur documento na Parlamento. Pero proximamente, como parti di un mayoria den Parlamento, no tin motibo pa tolera situacionnan similar, considerando cu un mayoria den Parlamento tin e poder pa exigi transparencia y responsabilisacion di ministernan y por kita nan confianza den ministernan cu no ta cumpli. Parlamento lo mester realmente asumi e responsabilidad di ta hefe di e ministernan, a pesar di nos sistema parlamentario cu tin e debilidad di crea un dependencia di parlamentarionan riba ministernan.

Pues tin diferente forma di traha cu por compensa un falta di confianza entre partidonan y percura pa credibilidad den un coalicion, na luga di pretende cu diripiente tur cos ta bon y tur hende ta integro ‘djis’ pa forma un gobierno.
Parlamento lo mester realmente asumi e responsabilidad di ta hefe di e ministernan.”

Mester remarca cu sr. Otmar Oduber continuamente a nenga e falta di integridad cu MEP a acusa su persona di tin y a expresa cu “partido MEP simplemente pa nan incapacidad di por haci nan trabou den parlamento, ta uza instancianan manera Ministerio Publico pa haci politica.” Sr. Oduber tambe a campaña cu ‘transparencia’ y ‘bon gobernacion’ como puntonan di programa. Aceptando y participando na un nivel mas halto di Good Governance lo yuda crea credibilidad pa un posibel coalicion cu MEP. 

Contrario na MEP, lider di ReD sr. Ricardo Croes si a sigui cuestiona e integridad di sr. Otmar Oduber mesun fuerte durante campaña. Mientrastanto sr. Croes, mescos cu sra. Evelyn Wever-Croes, a vocifera e prioridad di formacion di un gobierno pa Aruba. ReD tambe lo por tin un rol crucial den percura pa credibilidad den un posibel coalicion dunando prioridad na implementacion y cumplimento cu un nivel halto di transparencia den gobernacion, y por medio di eherce control for di Parlamento. 
Lo mester trata di un mehoracion serio y drastico den transparencia gubernamental y no ‘transparencia conveniente’.”

Transparencia y mas reglanan di Good Governance tambe a resona for di partidonan RAIZ y UPP, cu no a logra asiento. Actualmente ta na esnan cu si a logra asiento pa asumi e responsabiliad pa trece mas credibilidad den gobernacion di nos pais. Esaki ta inclui AVP, e partido mas grandi y pronto kisas e unico partido den oposicion, cu lo tin e responsabilidad di eherce un oposicion serio, contribuyendo na e checks and balances necesario den nos democracia. 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.