Pasando den barionan mas afecta manera Madiki y Palm Beach. 

ORANJESTAD – Prome Minister Mike Eman y Minister di Infrastructura Sevinger tabata personalmente activo durante esfuerzonan haci den bario pa alivia e dañonan causa pa e yobida fuerte y repentino di diadomingo ultimo.

Den un programa cu ta yama ‘Hunto Nos Ta Yuda’, Premier Eman a splica cu a reparti e forma con e rapport di calamidad ta wordo ehecuta. For di diadomingo a cuminsa cu e proceso caba atendiendo emergencianan manera con polis a scapa bida di ciudadano, ora cu coriente a bay, etc. Inmediatamente despues a inventarisa daño manera perdida material cerca esnan di poco recurso.

Participando den e accion ‘Hunto Nos Ta Yuda’ tin boluntarionan di Crus Cora cu ta registra peticionnan di ayudo y ta trece articulonan cu por tin caba pa yuda cune. Departamento di Asuntonan Social tambe ta tuma informacion pa wak si ciudadanonan ta cay na remarke pa algun tipo di asistencia social sea monetario of di sosten psicologico, etc. Ekiponan di Serlimar tey haciendo limpiesa di espacionan publico, como tambe cu bakinan grandi pa benta sushi afo.

Departamento di Obranan Publico ta cuminsa haci trabounan pa drecha caminda y planifica unda trabounan mas extenso lo ta necesario. Gele Koorts Muskietbestrijding a haci control y distribui informacion pa evita posibel criaderonan di sangura. Por ultimo, pero no menos importante, Departamento di Salud Publico tabatin profesionalnan medico bishitando casnan pa evalua e salud di e habitantenan.

Minister President Mike Eman a duna di conoce cu e accion ‘Hunto Nos Ta Yuda’ cu a cuminsa fisicamente diaranson den barionan, ta bay continua diahuebs y diabierna den tur su forsa, y invidualmente pa cada instancia, segun cu ta necesario.

Diaranson a cana den bario di Madiki pa haci limpiesa grandi yudando hendenan deshaci di mueble, mata y otro cosnan cu a keda atras di e mal tempo y cu nan no tin e manera pa haci esaki nan mes. Simultaneamente e accion aki a tuma luga tambe den bicindario Palm Beach y Verano.

Expresionnan haci den e articulo aki no necesariamente ta refleha opinion di ArenaPoliti.co