"Cu hopi entusiasmo mi a cuminsa ehecuta mi trabounan den e Comision di Integridad di Reino, y ya nos a reuni un biaha caba den e comision. Pero mi por a pensa cu den seno di partido AVP, nan tabata tin hopi problema cu e nombracion aki, pasobra nunca nan a permiti MEP ta den comisionan asina. Y na final nan a logra sacami di e comision. Pero esaki lo no strobami den mi meta y esey ta pa Aruba haya un gobierno integro, pasobra Aruba merece mihor", tabata palabranan di sra. Evelyn Wever-Croes durante e ultimo dia di reunionnan di IPKO cu parlamentonan di Hulanda, Sint Maarten y Corsou.

Riba termino hopi cortico Aruba mester introdusi e ley di financiamento di partidonan politico, y ya ta 4 anja consecutivo cu delegacion di AVP ta priminti den IPKO cu lo bin cu e ley aki, sinembargo te dia di awe nan no a hasi nada pa pasa e ley aki den Parlamento. Mescos ta conta cu e leynan di screening di ministernan. Ta imposibel cu Mike Eman mester screen su mes, algo cu e hulandesnan tampoco ta compronde. Hustamente e dos leynan aki Evelyn Wever-Croes ta boga pa wordo introdusi mas pronto cu ta posibel.

Riba e pregunta di e motibo cu AVP a sak'e di e comision, sra. Wever-Croes a bisa: "Sr. Herde a bisami cu e motibo cu e ta sacami di e comision ta pasobra ami lo a duna mi opinion den corant cu Gobernador di Aruba no a actua incorecto, algo cu semper mi a bisa, y mi lo sigi bisa. Den e articulo no tin nada skibi cu no ta corecto, y tur esnan cu a sigi e reunionnan mes por a scucha y mira esaki. Si AVP a kere cu nan por a hincami den un comision y asina strobami di duna mi opinion, of forsami pa cambia di opinion, nan ta mal equiboca. Mi no ta tuma sr. Herde na malo, pasobra e no por yuda. E simplemente no tin control riba su fraccion".

Tambe a puntra Wever-Croes su opinion tocante su remplasante den e comision, Marlon Sneek, pero riba esey e ta prefera di no a duna comentario.

"Mi responsabilidad cu e pueblo di Aruba ta pa nos tin gobernantenan integro, y mi kier a duna e bon ehempel cu Parlamento mes por bin cu e leynan aki. Apesar cu mi no ta parti mas di e comision di Reino, mi lo sigi traha riba esaki. Pami integridad ta algo sumamente importante, y mi lo no descansa te ora nos tin e leynan na lugar. Unico cos cu ta duel mi ta cu awor cu mi no ta parti di e comision mas, lo tarda hopi atrobe prome cu e leynan aki bin, pero mi compromiso ta pa introdusi e leynan aki asina cu nos ta den gobierno bek", sra. Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co