"Un momento MEP tin boca yen di hisa nivel di politica of di integridad. Un rato despues nan ta gaña manera ta nada. Gañamento aparentemente ta normal den MEP. Pa majoria di hende na mundo gañamento ta algo malo. E ta un señal cu bo no tin argumento of djis bo no kier bisa berdad. Diabierna pasa MEP a bolbe demostra cu pa falta di argumento of pasobra nan no por anda cu berdad, nan ta gaña, gaña y bolbe gaña."  Esaki tabata un di e reaccionnan diabierna mainta di e lider di fraccion di AVP, Rene Herde', despues cu ela lesa e articulo cu MEP a publica diabierna den corant.
E articulo ta cuminsa cu e mentira flagrante y ofensivo, bisando cu e miembronan di e delegacionnan di e cuatro paisnan di Reino lo a yega na e conclusion cu gobernador di Aruba tabata tin rason pa interveni aña pasa den gobernacion di Aruba. E berdad ta cu na ningun momento ni a discuti mes riba e desicion di gobernador y tampoco no a saca niun conclusion riba e punto aki. Kier men cu atrobe a gara e partido MEP ta inventa algo y scirbi esaki den corant como sifuera ela sosode di berdad. Rene Herde':" Ta esaki ta e motibo pakico a dicidi den e delegacion di Aruba pa kita sra. Evelyna Wever-Croes for di e posicion di representante di parlamento di Aruba den e comision di integridad den gobernacion den Reino. No ta pasobra ta trata di Sra. Evelyna Wever-Croes. Al contrario ta ami mes a propone pa e bira e representante, apesar cu tin hopi pregunta di integridad rond di su persona. Ta e echo cu ela declara of laga declara of aproba e declaracionnan cu ta totalmente incorecto. Pio ainda, ela hinca miembronan di parlamento di Corsow, Sint Maarten y Hulanda den problema door di crea e impresion cu nan tambe a yega na e conclusion ey. Siendo cu e topico ni a wordo trata den e reunion. E desaprobacion di e declaracion haci den prensa tabata unanime. Nan a laga na delegacion di Aruba pa dicidi kico pa haci cu e acto totalmente incorecto aki. Despues di a dicuti esaki cu e otro dos fraccionnan den e delegacion di Aruba, ami a tuma e desicion di informa sra. Evelyna Wever Croes cu e no por keda den e funcion di representante di parlamento di Aruba den e funcion ey. E gañamento acustumbra di MEP a sali'e masha malo y a bolbe pone cara di parlamento di Aruba na berguensa."

REPETICION
Ainda ta corda cu aña pasa den e reunion di IPKO na Corsow, cu e mes un lider di MEP a traha un documento y a pon'e riba papel di Parlamento di Aruba pa crea e impresion cu e documento lo ta un documento di henter parlamento di Aruba. En realidad e tabata un documento cu e mes a traha cu solamente opinionnan y insinuacionnan di e partido MEP. Ora e gañamento aki a sali na cla durante di e conferencia, a kita e documento for di mesa y a desaproba e comportacion aki completamente. Algun miembro di delegacion di Hulanda a hasta kibra e documento di sra. Evelyn Wever Croes demonstrativamente sinta na mesa. E aña aki a ripiti e forma di traha incorecto y contra tur norma di decencia, door di gaña over di loke a discuti y conclui den e conferencia. Gañamento y falcedad ta en berdad algo normal den MEP.

Expresionnan haci den e articulo aki no necesariamente ta refleha opinion di ArenaPoliti.co