Despues cu fraccion di AVP mediante di parlamentario Donny Rasmijn a claba pueblo un cuchiu den lomba siman pasa door di introduci e medida di aumento di BBO cu 1% (Health Tax), awor como ‘regalo’ na e clase trahador nan a dicidi pareu cu e aumento aki di reduci e prima di AZV cu 1%. Cu e maniobra manipulativo y ad hoc aki nan ta cla pa bolbe ranca miyones di florin for di e saco di e pueblo Arubano y p’asina nan por sigui malgasta. Sinembargo locual e parlamentario Donny Rasmijn no a splica pueblo ta cu desde cu su partido a drenta gobierno na final di 2009 ta solamente medida tras di medida a ser imponi riba lomba di e clase trahador.


Medidanan cruel

1. Entrante 1 di januari 2011 gobierno di AVP a aumenta e prima di AZV cu 1%
2. Entrante 1 di januari 2014 a aumenta e prima di AOV cu 1%
3. Entrante 1 di oktober 2014 a aumenta e prijs di coriente cu 15%
4. Alavez a introduci un vastrecht di 12.50 florin riba recibo di coriente
5. A aumenta e tarifa di bus for di 2,25 florin te cu 2,50 florin
6. Entrante 1 december 2014 a aumenta BBO cu 1% y a yama esaki Health Tax
7. Entrante 1 di januari 2015 a aumenta e prima di AOV cu 1%
8. Entrante 1 di januari 2015 a cuminsa cobra 27 florin pa luna pa recoge sushi
9. Entrante 1 di juli 2015 lo aumenta e BBO cu 1% y esaki pa AZV (Health Tax)

Sin duda cu tur e medidanan cruel aki a pisa inmensamente den cartera di tur trahador na Aruba y en especial esnan cu ta cobra salario minimo di 1637 florin pa luna. Tur e medidanan aki a haci cu e poder di compra a bay drasticamente atras. Hecho ta cu e miserabel Reparatietoeslag di 50 florin pa luna cu gobierno ta duna no ta compensa e perdida di compra di e clase trahador y riba dje Gabinete Eman lo bay elimina e Reparatietoeslag aki entrante 2018.

E bon Samaritanonan
Awor hungando pa un bon Samaritano, Donny Rasmijn kier gaña tira algo pa e clase trahador door di percura pa un reduccion miserabel di 1% di e prima di AZV, siendo cu pa AZV so gobierno di AVP a impone den total 3% di aumento di prima den 4 aña di tempo. Despues di e stunt politico aki di Donny Rasmijn, Minister Paul Croes no kier a keda atras y tambe hungando pa un bon Samaritano ta declara cu su persona lo bay percura pa un aumento di salario minimo entrante 2016. Pero e politiconan di AVP no tin ningun tiki di berguensa? Desde cu nan a drenta gobernacion y durante 6 aña largo apenas nan a aumenta e salario minimo for di 1543 florin te cu 1637 florin pa luna, cual ta un promedio di aumento di 15 florin pa luna!

Contrario na e maneho anti-clase trahador aki di AVP, durante e gobernacion social democrata di MEP e sueldo minimo a ser aumenta na 7 ocasion, esta for di 960 florin te 1543 florin pa luna, pues cu un promedio di aumento di 73 florin pa luna. Compara e 73 florin di MEP y e 15 florin di AVP!

Ta increibel con e gobierno di AVP kier sigui manipula mente di pueblo y awor kier tira un cachi cachi pa e clase trahador, cual nos di MEP ta cualifica como “een doekje voor het bloeden”. Partido AVP a masacra e pueblo trahador y awor kier pa tapa un herida cu nan mes a ocasiona.

Expresionnan haci den e articulo aki no necesariamente ta refleha opinion di ArenaPoliti.co