Rene Herdé (AVP): Mas motibo pa renoba sistema di belasting
MEP ta contra!
Tin hopi motibo pa renoba e sistema di belasting bieuw cu Aruba tin. Gobierno di AVP a laga traha un plan di renobacion completo cu ta drenta na vigor na januari 2016. E renobacion lo elimina diferente cosnan incorecto y hasta inhusto cu tin den e sistema bieuw. E sistema nobo ta haci pagamento y cobransa di belasting mas facil. E lo elimina cierto tipo di belasting y lo introduci un nobo. Na final e lo baha e peso di belasting y percura tur hende paga loke nan mester paga y na tempo. Nada mas y nada menos.
PLACA RIBA CAYA
Door di e atraso den cobransa bou di e sistema bieuw di belasting cu tin awor aki, tin mas cu 2 BIYON florin riba caya cu no a cobra ainda. Den prensa Hulandes a scirbi e siman aki cu Aruba ta un "paraiso di belasting" pasobra e chens pa bo wordo cobra lo ta chikito. Esaki simpelmente no ta berdad, pasobra tur hende mester paga belasting. Echo ta cu si e departamento no cobra hende, no ta tur ta paga. Loke si ta berdad ta cu e sistema bieuw ta depende mucho hopi di cobransa di belasting cu ta sali directamente di salario di trahadornan (loonbelasting) y di belasting cu por cobra facilmente. Ta door di esaki tin mucho hende y compania cu a keda sin paga belasting. Pa colmo e lider di MEP cu ta un experto di belasting y tabata un di e hefenan mas halto na departamento di belasting, ta conseha hende pa NO paga belasting cu nan debe pais. Hopi hende aki na Aruba y na Hulanda a haya e expresion aki uno masha irresponsabel pa un lider politico y un ex-inspector di belasting. Mas ainda pasobra e sa ta cuanto placa tin riba caya y na mes un momento ta critica cu ta haci fiansa pa cubri gastonan.
COBRA BELASTING ATRASA PROME
Segun e corant Hulandes, Aruba no lo mester a haya su mes den e situacion di fia placa y aumenta debe, si e tin tanto placa (2 biyon florin) sin cobra. Tambe e discucion cu Hulanda lo no mester a sosode. Pesey e escojencia di minister di finansa pa cobra e placa cu tin riba caya prome cu introduci belastingnan nobo, ta asina logico. Ta pa e motibo aki tambe gobierno a rechasa e idea di tuma medida pisa y introduci e belasting di 'solidaridad' manera CFT a propone. Esey no ta necesario si por cobra mas di e placa cu hende y companianan lo mester a paga caba. Pa preveni cu e situacion aki ripiti su mes den futuro, gobierno ta bay renoba henter e sistema di belasting. Di e forma ey gobierno ta haya e placa cu e mester haya pa cubri gastonan di gobierno. Pero ya ta notabel cu e partido MEP ta contra. E lider di MEP a bisa hende pa no paga loke nan no a paga na belasting, sabiendo cuanto placa tin riba caya. E lider di MEP sa tambe cu ora introduci e sistema nobo, e necesidad di fia placa ta bira menos y gobierno lo por cuminsa paga e debe di ultimo 30 aña mas lihe. Obviamente e lider di MEP no kier esey. E ta prefera pa keda cu e sistema bieuw y tene Aruba den e situacion di debe. Fraccion di AVP si ta na fabor di renoba e sistema, alivia peso di belasting, haci e pagamento y cobramento di belasting mas facil y percura pa balansa entrada y gasto di gobierno miho. Rene Herde: "Mare por a introduci partinan di e sistema nobo mas lihe. Lamentabelmente e organisacion di e departamento no ta haci esey posibel. Pasobra mas lihe haci esaki, ta mas lihe lo por baha e deficit, baha e debe y balansa finansa publico."
Expresionnan haci den e articulo aki no necesariamente ta refleha opinion di ArenaPoliti.co