E liña berde di AVP ta cuminsa y sigui cu trato igual pa tur! 

"No ta cuanto potret bo saca den corant y pone riba facebook ta bisa kico un politico of un partido politico ta haci pa su pais. No ta su nomber of e color cu e ta usa ta bisa pa kico e ta para pe. Ta loke e partido y su miembronan haci den nan trabao politico ta conta. Bo ta huzga un partido na loke e ta haci! Si bo wak tur loke e gobierno y parlamento di partido AVP a y ta haci, bo por conclui bon kico e partido ta para pe. Nos ta para pa interes di tur. E echonan ta papia p'e." Esey ta loke Rene Herde' di AVP a bisa contestando preguntanan riba futuro di partidonan politico, mirando e desaroyonan internacional y e presion riba partidonan politico pa renoba nan politica y nan forma di traha. Na Europa partidonan politico ta bou critica pisa pasobra ta di austerisacion so nan por papia. Pueblo kier wak otro politica nobo y sincero. Na Spaña e deseo pa wak cambio for di e austerisacion y mas atencion pa necesidad di pueblo, a resulta den cambionan grandi den politica nacional. "No e cifranan, pero e pueblo" ta un di e demandanan. Esey ta bay sosode den otro paisnan di Europa tambe. Kico ta e caso na Aruba?

RENOBA Y REFORMA
Segun Rene Herde' e echo cu AVP ta e partido mas innovador na Aruba, ta debi na e forma di renoba y reforma e partido internamente continuamente. Auto-critica y ta habri pa tur opinion ta haci cu continuamente nos ta busca ideanan nobo, solucionnan diferente y formanan nobo pa atende cu retonan bieuw y nobo cu nos pais ta confronta. Ta hopi partido a lanta y desaparece atrobe. Loke ta haci cu un partido manera AVP ta keda existi, ta door di cu e ta sigui adapta su mes y scucha loke ta biba den pueblo. Pero semper sin perde su principionan. Segun Rene Herde' bo ta wak e principionan cu ta guia AVP bek den tur loke e partido ta haci.

E LIÑA BERDE
Rene Herde':"Djis co'i algun di e temanan mas importante di e ultimo añanan di gobernacion di AVP. E liña berde den tur loke nos a haci ta pa regla asuntonan di tal forma cu tur hende den nos comunidad pa beneficia didje y cu esnan mas vulnerabel ta haya extra proteccion of sosten. Interes general y no interes personal. Esey tambe ta e liña berde den tur loke nos haci. Ora a cuminsa cu e reforma di nos sistema di pensioen pa salba e pensioen di mas cu 20 mil pensionado awor y esnan den futuro, a cuminsa cu hisa e edad di pensioen di politiconan prome. Si tabata pa cuida propio interes lo por a lagu'e manera semper e tabata y manera MEP kier pa e ta. Esta cu trato special pa politiconan. Nos a haya cu e mester a cambia y nos a cambi'e. Ora di yuda tene forsa di compra a percura pa tur trahado y tur pensionado haya sosten. No solamente e trahadornan y pensionadonan di gobierno. E interes di tur a conta. Ora di baha e prijs di awa y coriente dos aña pasa, a parti e rebaho pa tur hende hay. Esnan cu menos entrada a haya mas rebaho. Interes di tur, en especial esnan di menos forsa di compra a resalta. Ora a dicidi di introduci e sosten pa tur trahado den sector priva cu ayudo directo den nan salario (=reparatietoeslag) y ora di introduci e pensioen general pa tur trahado den sector priva, a sali for di e pensamento cu tur trahado merece un entrada mas sigur ora e baha cu pensioen. Den futuro tur trahado lo tin awor e pensioen di behez y un pensioen di trabou." Segun Rene Herde' asina por pasa door di cada desicion y bo ta wak e liña berde di AVP cu ta bisa: percura pa sirbi tur hende, specialmente esnan di menos recurso. Segun Rene Herde' ta asina bo ta huzga un partido. Na loke e bisa y haci. Na loke su prioridadnan ta y ken e ta sirbi cu su desicionnan. Den caso di AVP e interes di tur y no e interes di un grupo so, semper ta loke ta conta.

Expresionnan haci den e articulo aki no necesariamente ta refleha opinion di ArenaPoliti.co