Nan ta mira oportunidadnan di cooperacion entre Aruba y Merca riba e tereno aki

ORANJESTAD- Na Aruba gobierno ta implementando un proyecto unda hobennan cu ta bayendo scol secundario ta haya guia den oranan di atardi despues di scol. Un bon proyecto, sigur si tene na cuenta cu un cantidad numeroso di hoben ta bay cas  atardi na unda no tin supervision, no tin guia ni tampoco actividadnan productivo. Esaki pasobra den mayoria caso ambos mayor ta traha pa cria nan famia.  E hobennan ta nan so na cas cu tur e tentacionnan cu tin eyfo. Esaki tardi of tempran por tin su repercusion riba sociedad. Na Merca na unda tin programanan pa hobennan a keda comproba cu e hoben cu ta haya e guia necesario tin hopi menos chens pa haya su mes den contacto cu husticia. Motibonan di sobra tin pa bin cu un proyecto na unda hobennan di scolnan secundario por haya e guia necesario, den un ambiente sigur na unda tin supervision, guia y cuminda saludabel pa come. Durante su bishita na Merca siman pasa Prome Minister Mike Eman a bishita ehecutivonan di ‘After School Alliance’ unda el a haya informacion con eynan ta guia e hobennan cu bon programacion. Henter e team di profesional cu tabata presente a keda impresiona cu e iniciativa di Prome Minister. Nan ta mira oportunidadnan di cooperacion entre Aruba y Merca riba e tereno aki.

Director ehecutivo  sra. Jody Grant di e ‘Afterschool Alliance’ a splica cu e Alliance ta un organisacion cu tin bou su encargo 26 mil programa escolar den henter Merca. E y su team a topa cu Prome Minister Eman y nan a keda gratamente impresiona con Aruba ta trahando duro pa bin cu actividadnan educativo pa hobennan despues di scol. “E ta algo tremendo y na mes momento necesario.”

Ed Spitzberg, Vice Presidente di Desaroyo di e After School Alliance a splica cu nan ta e voz di e programanan escolar den henter Merca. “Nos ta percura pa nos programanan wordo bon comunica den henter e pais.” Spitzberg a bisa cu gobierno Mericano ta sostene e programanan aki completamente. Na final Spitzberg a comenta cu nan kier yuda Aruba unda por, mirando e nececidad  cu tin y e iniciativa di Prome Minister cu a inspira nan.

Erik Peterson, e persona encarga cu policy publico di e After School Allaince, a bisa di ta contento ora nan a tende di e proyecto ‘Naschoolse opvang’ cu Prome Minister ta desaroyando pa hobennan despues di scol. “Nos sa di otro paisnan, pero tambe di Merca mes cu e programanan aki tin un tremendo impacto riba e hubentud. Nan ta wordo guia den haya e capacidad profesional cu nan mester. Den tur pais y particularmente na Aruba ora gobierno sostene programanan escolar similar na loke nos tin, e hobennan por descubri pasion, hobby, profesion y potencialnan nobo. Esaki por ta riba tur tereno.”

Vice Presidente pa ‘Policy & Research’ di e After School Alliance’ sra. Jennifer Reinhard, tambe tabata presente durante bishita di Prome Minister Eman. “E plannan cu tin na Aruba pa e proyecto pa guia hobennan despues di scol, ta start riba un base realmente hopi solido. Loke Eman kier implementa ta loke nos tambe ta practica aki. Tin hopi opcion pa e hobennan riba tereno di educacion cu nan ta haya den e oranan despues di scol. Tambe hopi similaridad cu loke nos ta ofrece aki na Merca.” Mescos cu e otronan sra. Reinhard a mira oportunidadnan di cooperacion entre e After School Alliance y e Naschoolse Opvang di Aruba.  

Expresionnan haci den e articulo aki no necesariamente ta refleha opinion di ArenaPoliti.co