Mervin Wyatt-Ras durante conferencia di prensa semanal a trese padilanti cu su preguntanan haci na Minister Presidente encuanto di Sociale Vorming a ser contesta.

Wyatt-Ras ta tuma nota cu nos pueblo ta hopi satisfecho cu e proyecto aki cu ta dirigi ariba hobennan vulnerable den e edad dificil.

E proyecto aki ta ofrese perspectiva na e hobennan aki y nan ta haya sosten den comunicacion, habilidadnan practico, structura pa asina nan por asumi nan responsabilidadnan den futuro, p.e. un trabou y forma famia.

Pa loke ta trata e programa por a nota cu e hobennan ta stop cu e proyecto y aki e minister a splica cu tin diferente motibo pa cual un hoben ta stop cu e programa entre otro e ta haya un trabou, of su motivacion ta baha, of e ta haya problema na cas. E hecho cu e proyecto ta a base voluntario justamente ta positivo y segun minster por lo pronto no lo mester bin cambio den e ley. Wyatt-Ras a puntra si tin posibilidad cu hobennan di cual nan mayornan por paga tambe por participa y minister a contesta cu esaki no ta e caso pero cu por chek e posibilidad aki.

Wyatt-Ras kende a yega di presenta un mocion pa asina mucha muhernan ser inclui den e programa di Sociale Vorming a puntra minister dicon esaki no a tuma lugar.

Encuanto e asunto aki minister a duna di conoce cu tin un studio andando pa wak un ke otro tocante e grupo di mucha muher, cu lo keda kla na fin di anja. Manera Wyatt-Ras por a compronde e programa tin instructornan cu por traha cu mucha homber y ta rekeri ampliacion di experticio y adaptacion di e localidad pa por inclui mucha muhernan. En bista cu nos hobennan femenino ta esan cu mayan ta futuro mama y si nan ta den e grupo di risico e chens ta grandi cu nan futuro generacion ta nace cu dificultadnan, locual hustamente ta necesario pa preveni. Tin facilidadnan cu ta duna ayudo na mucha muhernan cu cierto dificutad manera na Imeldahof te 14 anja y Centro Orthopedagogico, sinembargo pa un grupo vulnerable no tin posibilidad. Wyatt-Ras lo keda pendiente di resultado di e investigacion pa entre otro por haya bista di cuanto caso tin di hobennan femenino cu tin necesidad pa un proyecto como tal. E Parlamentario a finaliza deseando e profesionalnan cu ta atende e proyecto y gobierno exito pa sigui cu formacion di nos hobennan ofresiendonan mas perspectiva pa futuro.  

Expresionnan haci den e articulo aki no necesariamente ta refleha opinion di ArenaPoliti.co