Dialuna Prome Minister Mike Eman y Minister encarga cu asuntonan di infrastructura, Benny Sevinger, a haci un recorido di proyecto di ‘Remodelacion Cas di Gobernador’ net pariba di Plasa 18 di Maart. Directora Sra. Yvonne Webb-Kock y ingeniero Daphne Every di monumentenbureau a topa e ministernan na e sitio di construccion como cu e departamento ey ta encarga cu coordinacion di e proyecto.

Sra. Yvonne Webb-Kock na final di e recorido di e proyecto, a splica cu aunke e proyecto a conoce algun retraso, esaki ta hayando e debido atencion y ta mustra cu e fase cu nan ta aden ta bay keda cla pa fin di luna di november.

Riba e pregunta di miembronan di prensa riba e destinacion di e edificio, sra. Webb-kock a splica cu “e ta bay ta un edificio cu ta bay ta multi-funcional.”  E directora di oficina di monumentonan, a splica cu e edificio ta destina pa reunion y actividadnan protocolario y tambe reunionnan di importancia.

Sra. Webb-Kock a splica cu ingeniero Daphne Every di Departamento di Monumento a traha riba e diseño cu tur aporte di su coleganan di e departamento di monumento. “Parti abou di e edificio lo keda cu e 'Woonkamer functie', lo tin 'Eetkamer functie', pero e ta bay ta mas tanto pa recepties y reunionnan den e edificio ey.”

Tambe Sra. Webb-Kock a splica cu e proyecto ta consisti di tres fase. E prome, cu compania di Sr. Omar Tromp, Felipe Construction ta trahando riba dje na e momentonan aki, ta financia pa Gobierno di Aruba, y e dos siguiente fasenan, cu ta inclui e parti paden di e edificio, ta financia pa gabinete di Gobernador di Aruba.

Na 2009 Gabinete Mike Eman a pone e vision cu a busca un caminda nobo pa conecta e bienestar y crecemento di Pais Aruba miho cu e calidad di bida na Aruba.  E inversionnan cu a haci pa Pais Aruba, no unicamente tin cu conduci na crecemento economico, pero tambe na un mehoracion social. Prome Minister a afirma esaki e mainta aki bisando, “e inversionnan mester ta basta mas riba calidad cu cantidad.”

Inversionnan extenso na Aruba ta inclui renobacion urbano, den bario, di infrastructura y renobacion di scolnan rond di nos isla. E proyecto ‘Remodelacion di Cas di Gobernador’ ta un parti integral di e prome fase di revitalisacion di Aruba, cu a cuminsa na aña 2009.

Expresionnan haci den e articulo aki no necesariamente ta refleha opinion di ArenaPoliti.co