Manera ta conoci Gabinete Mike Eman II a anuncia ehecucion di un proyecto piloto cu ta ofrece guia y formacion na hobennan di scolnan secundario den oranan di atardi. Esaki ta un trabou conhunto entre Ministerio di Asuntonan General y Ministerio di Enseñansa. Prome Minister Mike Eman a menciona tambe durante e anuncio, cu ademas di e proyecto aki, tambe ta trahando cu Minister Hooijboer-Winklaar riba introduccion di formacion civico como un vak den e programa regular di les na scol.

Como un tema cu ta na un nivel hopi importante den maneho di gobierno, cu ta bin dilanti hopi biaha den plannan manera di MFA, Formacion Social y BoBario. Cu esaki ta busca pa complementa e portfolio tradicional di les cu e aspectonan cu ta bay yuda nos mucha y hobennan, no solamente na ta personanan cu conocemento, pero tambe bon ciudadano. “Ta forma parti di e creacion di un sociedad cu ta brasa e idea di un desaroyo sostenibel pa pais Aruba. Nos ta sigur e ora cu nos comunidad lo tin un fundeshi hopi fuerte,” Premier Eman a splica.

Referiendo na e proyecto piloto Prome Minister Mike Eman a splica cu no ta djis concentra riba asistencia cu huiswerk, pero tambe ta enfoca riba desaroyo personal y desaroyo comunitario, arte y cultura. E prome mandatario a bisa cu en berdad e concepto ‘Beyond the Bell’ ta un programa hopi interesante den sentido cu e hoben ta haya oportunidad di haci su huiswerk bou di cierto guia profesional, den un ambiente di trankilidad y sigur. “Pero na mesun momento tambe e aspectonan cu hopi biaha ta tende cu falta na scolnan cu ta deporte, recreo, arte y cultura ta haya un luga hopi central den e proyecto aki.”

Lo haci esaki den cooperacion cu Organisacionnan No Gubernamental. Un ehempel cu Premier Eman a duna ta Parke Nacional Arikok. “Parke tin hopi documentacion riba flora y fauna cu por uza den educacion y tin personal prepara pa transmiti e informacion ey cu pasion y conocemento.” No solamente ta laga e hobennan haya  aprecio pa nos flora y fauna, pero tambe por inspira of stimula nan pa busca un ofishi den e sector aki y sostene un desaroyo sostenibel pa su proteccion.

Adicionalmente, Minister di Asuntonan General y Ministerio di Enseñansa ta trahando riba introduccion di Responsabilidad Civil como un vak den e curiculo di scol caminda hobennan ta haya oportunidad pa participa den lesnan cu ta desaroya nan sinti di responsabilidad civico. Minister President a splica: “Na Hulanda tin un programa asina cu yama Matschappelijke Stage, caminda muchanan ta haya cierto ora pa aña cu nan ta dedica na trabou pa comunidad. Nan por traha na un cas di anciano y nan ta haya un punto pa esey tambe y ta forma parti oficial di nan formacion.”

Gabinete Mike Eman II ta para tras di e iniciativa aki como un punto importante den evolucion di educacion y manera Prome Minister a indica, Departamento di Enseñansa a duna un bista positivo pa cu e idea aki. “Nos ta formando ciudadanonan cu mester carga e pais mañan. Den e formacion ey, rekenen y taal ta hopi importante, pero nos mester duna nan tambe e formacion como hende responsabel y cu sinti di convivencia pa cu otro y amor pa e isla y e futuro di e pais. Hunto nos ta spera di duna e aspectonan aki un luga mas central den educacion di Aruba pa futuro,” Prome Minister a finalisa bisando. 

Expresionnan haci den e articulo aki no necesariamente ta refleha opinion di ArenaPoliti.co