Desaroyonan den Caya Grandi ta demostrando cu tin un epoca bunita su dilanti. Tur indicacion ta cu e epoca scur di Caya Grandi mahos y sin bida y di un centro di ciudad neglisha y sin futuro a keda pa pasado. A rekeri e vision di un Gobierno dinamico, e inversion di un pais cu ta kere den su mes y e sacrificio di hopi hende, pero a logra e proposito: Oranjestad un biaha mas ta un capital digno di Aruba y un destino turistico riba su mes.

E frase conoci, “Trahe y nan lo bin,” a mustra di ta un realidad awe ora bo mira no solamente e cantidad di persona cu ta circula den Caya G.F. Betico Croes, pero tambe con cada dia tin un tienda nobo ta habri. Y esey ta simplemente un paso logico pa e comerciantenan cu ta wak cu tin un futuro prospero den centro di ciudad.

No ta casualidad cu marcanan di prestigio manera Mango ta haci inversion cuantioso pa comberti nan local den un mega tienda di tres piso, digno di cualkier capital Europeo di moda. Tienda di sapato Aldo tambe a muda for di un centro comercial prominente y a habri un tienda mas grandi y bunita den skina di Caya Grandi cu Oranjestraat. Pero bayendo mas ariba, bo ta haya awo un tienda di Aruba Aloe Balm, cu ya caba ta un exito cu turista y local, den apenas dos siman di operacion.

Te hasta e area cu tabata sufri mas di e olvido di maneho publico, tambe ta cuminsa wak bida florece cu apertura di tienda manera Birkenstock y den proximo luna, luganan di cuminda manera ConoPizza y Aki Sushi, sin laga afo The Main Street Lounge, tur den e edificio di Nicky Habibe. Ta trata aki di negoshinan cu tabatin of tin ainda presencia den e area popular di Palm Beach, banda di hotelnan, pero ta sinti cu no por keda sin probecha di e oportunidad potencial cu Caya Grandi ta ofrece awo.

E hecho aki, banda di e ponemento bek den funcionamento di e fontein su dilanti, como tambe banda di La Moderno y riba Plaza Daniel Leo, ta completa e ambiente bunita, limpi, di nivel halto, cu consumidornan ta sinti awo, ora cu nan ta bay haci compras den Caya Betico Croes. Ainda por menciona tambe e bankinan y otro detayenan chikito cu DOW ta instalando, como ultimo parti di e proyecto grandi renobacion y mehoracion di centro di ciudad cu Gabinete Mike Eman I a cuminsa for di su entrada den Gobierno.

Y tin ainda hopi mas na caminda. E formulacion di Business Improvement District (BID) cu ta keda cla proximamente, lo ta un adicion hopi valioso na e desaroyo positivo di comercio den Caya Grandi y ta traduci den un miho experiencia, calidad y servicio pa ciudadano y turista. Nan ta percura pa mantencion, siguridad y promocion di Caya Grandi. E ta un iniciativa di Gobierno actual, pero di caracter neutral y autonomo ya cu ta conta cu participacion di instancianan manera ATIA, KVK, AHATA y Gobierno.

E decision di Gobierno pa duna permiso di huur di espacio publico limita pa creacion di teras, ta un stap mas cerca di laga Caya Grandi tin un bida tanto den dia como durante oranan tempran di anochi. E concepto ta pa centro di ciudad haya un dimension mas dinamico caminda no solamente ta bay den caya pa haci compras, pero tambe pa sinta terasnan di cafe y restaurant. Ta invita comerciantenan pa comberti espacionan na di dos y di tres piso di nan edificio, den apartament pa pareha y ‘young professionals’ cu ta contribui na un fluho constante di persona, e revitalisacion di economia y un ambiente mas agradabel y safe pa un y tur.

Tur esaki y hopi mas ta canando su caminda y e avance ta visibel. Gabinete Mike Eman ta contento di mira cu tanto den Caya Principal, como den area rond di Oranjestad, e renacemento ta un realidad y ta un cooperacion entre sector publico y priva.

Expresionnan haci den e articulo aki no necesariamente ta refleha opinion di ArenaPoliti.co