Studiantenan Universitario ta bin Aruba pa “Summer Course” riba “European Law” 

ORANJESTAD – Siman pasa Prome Minister tabata na Washington DC, como invitado di Rey Willem Alexander, caminda cu a reuni cu representantenan di vario entidad y institutonan importante Mericano y internacional, manera ‘After School Alliance’ y World Bank. Prome Minister a reuni tambe cu representantenan di American University na Wahsington DC cu ta interesa den estrecha lasonan entre nan universidad y esun di Aruba. Particularmente riba termino cortico nan kier cuminsa haci uzo di Aruba su facilidadnan Universitario pa un Summer Course.

Directornan di diferente programa di Facultad di Ley, miembronan di diferente otro facultad, y Vice Presidente di American University a forma parti di e delegacion cu a reuni cu Prome Minister Eman. Encabesando e grupo tabata dr. David Hunter cu ta director di Facultad di Ley di American University.

E tabata un encuentro hopi interesante cu un meta specifico. “Nos a topa pa explora e diferente oportunidadnan pa traha cu Aruba,” dr. Hunter a cuminsa splicando. Bayendo un poco mas riba e tema aki, el a splica cu Aruba por brinda e studiantenan Mericanonan un oportunidad unico riba tereno legal. “E studiantenan por biaha pa Aruba y experencia e diferente retonan legal cu ta confronta aki y situacionnan legal unda cu leynan Europeo ta wordo aplica. Pues un bon chens pa siña algo di e leynan ey den un ambiente agradabel,” Hunter a señala.

E universidad aki ta enfoca hopi riba studiantenan internacional. Den e programa di Ley so tin 200 studiante internacional cu ta participa y ta spera cu por atrae mas studiante, tambe di Aruba, pa realisa nan estudio riba leynan internacional y den diferente otro area di ley. P'esey nan kier crea un programa pa promove intercambio di studiantenan entre America University y Universidad di Aruba. “E ta un relacion cu oportunidadnan mutuo pa studiantenan di Aruba studia na American University na Washington DC.”

Den cuadro di e intercambio aki, American University ya caba a mustra interes pa un grupo di studiante participa den e Summer Course di Universidad di Aruba. E curso ta trata “European Law” y ta wordo duna pa Profesor dr. Ernst Hirsch Ballin. E curso duna na Aruba ta acredita y ta conta pa e studiantenan por ricibi nan diploma di American University.

Basa riba e combersacionnan cu tabatin, e facultad di Ley tin pensa tambe di haci un invitacion na Prome Minister Mike Eman pa discuti e tema di e lucha hiba pa e Arubianonan haya derecho di voto pa Parlamento Europeo. A surgi un discusion di esaki entre varios miembro di e facultad, principalmente riba e punto di derecho humano tras di esaki y e strategia cu a wordo hiba pa yega te na Corte Europeo. “E lo ta un lectura interesante pa nos studiantenan y e miembronan di e facultad,” dr. Hunter a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co