ORANJESTAD/WASHINGTON- Na Aruba a cuminsa cu e proyecto ‘Naschoolse Opvang’ pa hobennan cu ta bayendo scolnan secundario. Pa motibo cu mayornan ta traha, hopi di e hobennan aki ta keda nan so na cas. Motibo pakico Prome Minister Mike Eman hunto cu Minister di Enseñansa Hooyboer a inicia cu e tremendo proyecto aki. Prome Minister Eman tabata na Washington riba un biahe di trabou riba peticion di Pareha Real durante nan bishita eynan, el a probecha pa  bishita esnan encarga cu e ‘Naschoolse Opvang’ eynan. El a haya informacion amplio y balioso eynan. Director ehecutivo di e ‘After School Alliance’ sra. Jody Grant tabata encanta cu bishita di e prome mandatario di Aruba.

Director ehecutivo  sra. Grant di e ‘Afterschool Alliance’ a splica cu e Alliance ta un organsacion cu tin bou su encargo 26 mil programa escolar den henter Merca. “Tur dia mas di 10 miyon studiante ta participa den e programanan aki y tur dia tin mas di 20 miyon studiante no tin e un programa despues di scol pa participa aden. Nos ta trahando duro pa remedia e situacion aki. Pasobra cada hoben tin e derecho pa por participa den un programa asina na unda e por haya conocimento importante pa ta exitoso den bida.” El a bisa cu e y su team a topa cu Prome Minister Eman y nan tur a keda masha impresiona con Aruba ta trahando duro pa bin cu actividadnan despues di scol pa hobennan. “E ta algo tremendo y na mes momento necesario.” Loke cu nan a ripara ta cu hobennan cu ta participa den e programanan aki ta haya nan mes menos den problema cu husticia compara cu esnan cu no ta atendiendo programanan asina. Programanan cu sigur ta haci un diferencia den un comunidad. “Mi ta desea Prome Minister Eman tur exito cu e programa cu e ta implementando”.

Ed Spitzberg, Vice Presidente di Desaroyo di e After School Alliance a splica cu nan ta e voz di e programanan escolar aki den henter Merca. “Nos ta percura pa nos programanan ta wordo bon comunica den henter e pais.” Spitzberg a bisa cu gobierno Mericano ta sostene e programanan aki grandemente. Tin un programa special ‘The 21^st century program’ cu ta percura pa e fondonan necesario pa e programanan escolar aki. “Mi ta haya masha interesante cu Prome Minister Mike Eman ta desaroyando un programa similar na Aruba. E ta bay tin un impacto grandi riba nivel individual y familiar. Tambe riba nivel di e comunidad y e pais. Programanan pa hobennan despues di scol tin un impacto grandi. Tur loke Prome Minister a bisa ta exactamente loke nos ta para pa nan aki. E tin e bon idea y pensamentonan pa loke ta e proyecto aki”. Na final Spitzberg a bisa cu nan kier yuda Aruba unda por. “Nos lo sigui den combersacion cu otro y segun e programa na Aruba ta bay ta avansando nos ta comparti loke nos sa, di loke nos a experencia y ta di spera cu e interaccion aki ta bay ta den ambos direccion. Asina nos ta siña di otro y ta sigui Aruba di cerca pa wak con e desaroyonan ta bay eynan”. 

Expresionnan haci den e articulo aki no necesariamente ta refleha opinion di ArenaPoliti.co