Diaranzon mainta na Berlin, Minister Plenipotenciario na Hulanda, Sr. Alfonso Boekhoudt a firma un ‘Memorandum of Understanding’ (MOU) durante e evento di organisacion pa Cooperacion y Desaroyo Economico (OECD) na nomber di pais Aruba, asina e Minister encarga cu finanzas di pais Aruba, Angel Bermudez a informa.

Varios pais a participa na e ceremonia aki entre nan Colombia, Brasil, Merca y Hulanda. Cu e firmamento di e acuerdo, Aruba ta forma parti di e asina yama ‘Multilateral Competent Authority Agreement on Automatic Exchange of Financial Account Information’, unda cu e paisnan participante ta yega na un convenio pa un sistema intercambio di informacion financiero.

Segun Minister Bermudez, mundialmente e intercambio di informacion aki ta wordo considera como un manera efectivo pa combati evasion di impuesto. “Cu firmamento di e acuerdo aki, Aruba lo wordo considera positivamente pa e paisnan cu ta interesa di haci negoshi cu nos y tambe ta limita e riesgo cu Aruba lo wordo registra riba asina yama ‘black list’”, e mandatario a splica.

Expresionnan haci den e articulo aki no necesariamente ta refleha opinion di ArenaPoliti.co