Esey ta e opinion di Bert Pieters, consehero riba energia renovabel pa Pais Corsou, kende a forma parti di e delegacion di representantenan di OCTA, e Overseas Countries & Territories Association di Union Europeo. E grupo a forma parti di e participantenan di e conferencia Green Aruba: Europe Meets the Americas y tabatin un agenda adicional di reunion y presentacionnan. Na final di su estadia, Pieters a bay satisfecho y motiva. Loke mas a hala su atencion ta e entusiasmo contagioso di Prome Minister Mike Eman y e manera con tur hende riba nos isla tin nan nanishi ta mustra den mesun direccion cu boluntad pa yega na e meta di 2020. “Mi ta bay cu hopi inspiracion bek Corsou.”

Pieters a admiti cu el a yega di tende y lesa di e conferencia di Green Aruba, pero esaki tabata su prome biaha presente. Como parti di e programa di actividad cu Aruba tabatin prepara pa e miembronan di OCTA, a inclui reunionnan caminda e diferente nacionnan por a delibera. Semper e tema di enfoke ta e retonan cu nan tin en comun y con por uni forsa pa presenta nan caso na Union Europeo pa haya e recurso y sosten necesario. E miembronan di OCTA ta busca pa avansa den e desaroyo di nan economia y sostenibilidad den diferente tereno.

Durante e estadia, Pieters a conta cu, nan a haya bishita di reconocemento na proyectonan manera parke di molina di Vader Piet y e planta di ‘waste to energy’ EcoGas. Tambe nan tabata presente pa apertura di e Solar Carport Park na Aeropuerto International Reina Beatrix. Pieters a expresa cu el a tuma nota cu tin hopi espacio y boluntad pa coopera cu otro. “Nos problemanan cu nos ta discuti, ta basa riba energia renobabel.”

Riba e disposicion di Pais Aruba pa comparti su conocemento y network cu e otro nacionnan chikito, Pieters ta kere cu esaki ta uno tremendo. Y aunke na Corsou tambe ta trahando den e direccion aki, “Un cos ta cu bo ta implementa ‘renewable energy’ y banda di dje cu bo ta invita partners y desaroyadonan di energia. na Aruba mi a wak hopi MOU cu te hasta start ups di Merca ta bin instala nan sistemanan aki. E ta algo di embarace,” Pieters a expresa.

Manera ta conoci, e tecnologianan aki ta den constante evolucion y ademas di esey, e condicionnan di lama, corosion, etc. na nos islanan, ta completamente diferente di e ambiente na Merca y Europa; pesey mes e implementacion ta importante, pa adapta. “E approach ta algo di aplaudi y un cos cu na Corsou sigur sigur kier habri e porta mas tanto pa tin cooperacion,” refiriendo na entre otro e cooperacion ricibi for di Utilities N.V. “Nan a habri hopi porta pa nos.” Pieters y e otro delegadonan a haya presentacion di diferente entidad y compania, como por ehempel TNO.

Expresionnan haci den e articulo aki no necesariamente ta refleha opinion di ArenaPoliti.co