Dialuna mainta tempran a habri cu un conferencia di prensa di Gabinete Mike Eman caminda a presenta resultado di ‘Green Aruba: Where Europe Meets the Americas’ cu a tuma luga e siman cu a pasa. Como president di e comision organisado, Richard Arends a comparti cu medionan local di prensa presente algun di e cifranan cu ta duna perspectiva di e exito di e evento annual. Arends a duna di conoce tambe cu e trabou di GA-EMA no a caba ainda. Awor e fase caminda ta bay cuminsa di monitoria e desaroyonan cu a acorda durante di e conferencia. Aki por pensa riba e resultadonan di e diferente reunion, acuerdo y MOU’nan acorda durante e conferencia.

Arends a expresa cu “por wak atras cu hopi satisfaccion,” no solamente riba e atendencia, pero tambe riba e contenido di e conferencia. El a indica cu e comision a haya hopi bon feedback. Manera ta conoci, e prome dia a dedica na tecnologia cu presentacionnan di compania y institucionnan manera Phillips y TNO. A tene presentacionnan tambe di estudionan cu ta compara e maneho energetico den nos region.

E di dos parti di e prome dia tabatin como punto resaltante e presentacion di Sr. Francisco Palmieri, representante di Asuntonan di Exterior Americano. E mensahe cu el a trece, den nomber di su gobierno, ta cu e gobierno Americano ta sostene y kier duna nan aporte na e maneho energetico di gobierno di Aruba.

E di dos dia a dedica riba e topico di infrastructura. E dia aki tabata tin presentacionnan relata na infrastructura sostenibel, manera solar park di aeropuerto y desaroyonan na waf di Barcadera. E di tres dia a enfoca riba turismo cu presentacion di Sr. Cousteau unda cu a enfoca riba e importancia di mantencion maritimo, un area cu na Aruba mester di mas atencion. Por ultimo, diasabra mainta tabatin un sala yen di hobennan studiante cu a bin pa presencia un tremendo presentacion di  Dr. André Kuipers, cu a comparti su experiencia como astronaut den ISS (International Space Station) pa 6 luna largo.

Arends a señala tambe cu tabatin un total di 10 Memorandum Of Understanding (MOU) cu a keda firma durante e siman y cu ta bay monitor nan ehecucion. No por keda sin menciona e apertura di planta ‘Waste to Energy’ di Ecogas, como tambe e apertura di e Solar Carport Park na Aeropuerto Internacional Reina Beatrix, cu ta riba nan mes ta resultado di MOU’s firma den edicionnan anterior di e conferencia. Un otro MOU firma, cu a demostra di ta uno hopi importante mes, tabata entre e gigante Hulandes Arbo Unie y e compania local Medwork, un ehempel cla di con companianan Europeo por uza Aruba como gateway pa habri mercado den e region.

Registro y analisis di e conferencia ta duna como resultado cu tabatin rond di 750 encuentro di B2B (Business to Business), 192 compania cu a participa for di 24 pais. Tur esaki ta adicional na e presentacionnan y e boothnan di exhibicion di e tradeshow.

Pa loke ta trata e financiamento di e conferencia, president di e comision a señala cu a conta cu 25 compania patrocinado. ‘Green Aruba: Europe Meets the Americas’ tabata sosteni financieramente dor di sector priva. Pa loke ta trata delegado y participantenan, Arends a reitera cu nan a paga nan mesun pasashi, hotel y estadia. “Tabatin casi 300 camber reserva durante e ultimo dianan,” el a comenta.

Manera menciona, ta bin e siguiente fase cu ta esun caminda e comision, incluyendo instancianan manera ARINA y Freezone Aruba N.V. ta haci ‘follow up’ riba e encuentronan sosteni. “Ta hopi importante pa di berdad monitor y wak kico ta concretisa su mes y unda mester di asistencia. Esey lo ta nos ocupacion durante e proximo dianan nos dilanti,” asina Arends a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co