EPB Santa Cruz ta un di e scolnan ehemplar riba tereno di sostenibilidad. Nan tin algun aña caba cu nan a crea nan Greenhouse den cual nan produci tanto fruta como berdura. Esaki nan ta haciendo den cooperacion cu Santa Rosa, cu a haya un rol hopi importante den e maneho di Gabinete Mike Eman I y II pa haci ciudadanonan mas consciente riba produccion di alimentonan pa Aruba bira mas sostenibel.

Prome Minister Mike Eman diasabra ultimo cu su Accion Pinta Bo Bario, hunto cu boluntarionan di su Ministerio, tabata na EPB Santa Cruz pa duna un man na e scol cu a cuminsa construccion di nan di dos Greenhouse. Un proyecto cu ta entusiasma e boluntarionan manera Miguel Wever, kende ta un persona hopi activo na Jan Flemming tambe.

Wever a splica cu nan a haya informacion cu EPB Santa Cruz ta trahando riba e proyecto aki, cual scol el a yega di bishita anteriormente hunto cu Prome Minister, y a haye algo bunita pa duna su cooperacion na dje como boluntario. “Mirando cu e ta den bario, mi a dicidi di duna un man mesora. Tin un grupo basta grandi cu a bini pa yuda. Tin hende di diferente bario di Santa Cruz cu a duna un man.”

Miguel Wever ta un persona hopi activo den bario promoviendo comunitarismo. Hunto cu su comision tur aña nan ta decora un area na Jan Flemming. No solamente e ta un luga cu e hendenan por bishita pero e ta promove e trahamento hunto entre famia y bisiñanan. E biaha aki ta inclui hendenan di Macuarima y Balashi pa haci e famia mas grandi. E por bisa for di awor caba cu dia 13 di december e Parke di Jan Flemming ta keda inaugura. Grupo di Betico lo bay tey cu nan musica. Na Jan Flemming 6, cas di Defunto Maca, kende a inaugura e parke aña pasa, tambe tin un proyecto na su honor.

Ademas di e proyecto di fin di aña, ya caba nan ta pensando pa construi un Greenhouse den e bario di Jan Flemming tambe. “Nos kier sigui stimula e hobennan di bario den e area di agricultura, siña nan planta matanan cu nan mes por uza.” Lo bay concentra riba e matanan cu por cu e clima di Aruba.

Expresionnan haci den e articulo aki no necesariamente ta refleha opinion di ArenaPoliti.co