Reunion cu e diferente sindicato ta algo cu Minister di Finanzas, Angel Bermudez ta haci mensualmente, sin embargo despues cu Sindicato Aduanero di Aruba (SADA) vocifera y manifesta e mal contento di e duaneronan di Aruba, e mandatario di finanzas, a percura pa reuni lo mas pronto posibel pa asina nan tambe por splica e motibo tras di e ultimo ‘walk out’ y tambe demas problematica cu ta perhudica nan trabou diario.

Diahuebs ultimo miembronan di SADA tabata tin e oportunidad di comparti nan frustracionan den busca di un solucion na e problemanan cu nan ta enfrenta. Entre algun punto di discusion a menciona e situacion actual di e diferente ‘landsbesluit’ cu ainda ta pendiente, e situacion sanitario di e edificio principal di Aduana y algun ekipo necesario pa e duaneronan por eherce nan trabou entre otro.

Despues di a sinta na mesa cu SADA y a scucha varios di e keho di e sindicato, Minister Bermudez a dicidi di haci un bishita na Cuerpo di Aduana na Aeropuerto Internacional Reina Beatrix e diabierna siguiente pa e mes por mira e condicion y papia mas di cerca cu e duaneronan pa nan splica kico ta e problemanan cu ta haci cu nan no por funciona adecuadamente.

“Mi a haya un bon ‘bistaso’ y un bon splicacion di e parti di logistica y infrastructura caminda cu nan a duna nan comentarionan riba con nan ta kere cierto cambionan mester tuma luga pa nan funciona mas miho”, e mandatario a bisa despues di su bishita na aeropuerto.

Minister Bermudez sigur a constata cu ta solamente un mashin di scan ta traha, mientras cu e otro ta wordo uza pa e piezanan como un reemplaso den e mashin cu si ta funciona. Tambe e mandatario ta pensa cu mester tuma na cuenta full e infrastructura y mira con por inverti den e añanan venidero adecuadamente pa asina e miembronan di aduana por haci nan trabou bon.

Mester enfatisa cu tin algun detaye cu por wordo resolvi riba termino corto, pues Minister Bermudez ta kere cu un bon comunicacion cu Minister di Turismo, Sr., Otmar Oduber y tambe e directiva di ‘Aruba Airport Authority’ lo logra un solucion hopi lihe. Na mes momento tambe tin cambionan cu lo tuma mas tempo manera e sistema di ‘liña’ caminda cu e bishitantenan ta pasa door di duana, esaki sigur lo por wordo modernisa pero lo trece cambio tambe na e ‘booth’ nan y e ekipo necesario pa logra esaki.

Di otro banda e edificio principal ta un topico di discusion ainda, pues ya caba ta conoci cu decision a wordo tuma pa muda e waf di container. Logicamente lo mas ideal y segun ley ta pa muda e oficina principal di duana tambe cerca di e waf sin embargo ningun decision no a wordo tuma riba esey ainda.

Minister Bermudez ta enfatisa cu departamento di Aduana ta un departamento hopi importante pa nos, pues e ta na frontera di nos pais caminda cu e ta encarga cu supervision riba productonan y riba materialnan cu ta yega nos isla. Cualkier plannan futuro lo mester wordo concretisa pa e ‘infra team’ den colaboracion di cuerpo di aduana pa asina yega na un diseño di edificio cu ta pone tambe cu aduana por funciona adecuadamente.

Expresionnan haci den e articulo aki no necesariamente ta refleha opinion di ArenaPoliti.co