No ta prome biaha cu varios comentario respecto e funcion di Sr. Juan David Yrausquin ta circula. E biaha aki un fraccion den oposicion den Parlamento a dirigi algun pregunta na e mandatario di finanzas di cual e no tin problema pa aclaria y asina evita cualkier mal comprencion.

Minister di Finanzas sigur ta haya oportuno pa remarca cu igual na tur otro mandatario den pasado, Sr. Yrausquin su peticion pa e asina yama “overbruggings regeling” a wordo honra conforme ley na momento cu e la retira como Minister. Esaki ta premiti’e conta cu un entrada reduci cu 20% durante un periodo limita como un ex-mandatario tur esten Sr. Yrausquin haya un otro funcion of trabou caminda e lo ricibi un entrada fiho, “den esey no tin nada particular”, e mandatario a indica.

Na mes momento e Minister Bermudez ta rechasa e comentarionan cu ta circula tocante e supuesto funcion di Juan David Yrausquin den su departamento y ta enfatisa lo siguiente, “Sr. Yrauquin no tin ningun contracto cu mi of cu Gobierno, e no ta mi ‘chief of staff’ ni tampoco miembro di mi staff permanente manera cu ta wordo comenta”.

“Ta mi prerogativo y mi ta consult’e ora mi ta haya oportuno pa mi por yega na continuidad den mi maneho di e ministerio aki y e consultanan ey no ta wordo paga den ningun forma”, Minister Bermudez ta informa. E mandatario di finanzas ta splica cu e consultanan cu Sr. Yrausquin ta ‘pro bono’, pues e consultanan aki no tin costo y na momento cu Minister Bermudez ta considera esaki necesario, ta rekeri di informacion of antecedentenan relaciona cu un situacion actual y cu ta concerni su cartera e ta haci su consulta.

Di otro banda e mandatario ta confirma cu en berdad e la pidi Sr. Juan David Yrausquin pa compañe na e diferente sesionnan cu ta tuma luga na Washington en relacion cu e reunion anual di World Bank y IMF ultimo. “Durante su periodo como Minister, Sr. Yrausquin mes ta kende a cuminsa e dialogo cu e organisacionnan aki y nan actornan, pues mi a prefera pa e tambe t’ey presenta asina mi ta na altura di tur antecedente y por continua cu e maneho di e cartera di finanzas manera debe ser”, Minister Bermudez ta sigui clarifica.

Finalmente e mandatario ta indica cu contrario na si ela hiba cualkier otro consehero, solamente e biahe y estadia a wordo paga pa Sr. Yrauquin na Washington segun e reglanan existente.  Pa loke ta trata e demas preguntanan di parti e fraccion tocante e remuneracion di Sr. Juan David Yrausquin, e mandatario no tin problema cu transparencia pues e lo contestanan debidamente asina cu e ricibi esakinan di parti di e fraccion.

Expresionnan haci den e articulo aki no necesariamente ta refleha opinion di ArenaPoliti.co