Dialuna mainta, Ministernan Mike Eman y Benny Sevinger a haci un recorido di e proyecto 'Remodelacion di Cas di Gobernador'. E proyecto ta den un fase avansa caba y hunto cu directora di Monumentenbureau Sra. Yvonne Webb-Kock y arkitecto di e proyecto, Sra. Daphne Every e ministernan a haya un presentacion di e trabou cu a wordo haci te na e momentonan aki.

Na e sitio di trabou nan a wordo ricibi pa director di , Felipe Construction, Sr. Omar Tromp, cu ta encarga cu proyecto di renobacion di e edificio situa riba L.G. Smith Boulevard.

E recordido di e proyecto tabata uno basta extenso y despues miembronan di prensa a haya un momento pa combersa cu ministernan, repersentantenan di monumentenbureau y tambe director di Felipe Construction cu ta e contratista principal di e proyecto.

Prome Minster Mike Eman a splica cu desde cu e gabinetenan cu el a lidera a drenta gobierno na 2009, e vision cu a pone nan dilanti a busca un caminda nobo pa conecta e bienestar y crecemento di Pais Aruba miho cu e calidad di bida den nos comunidad. Sr. Eman a splica cu, “e inversionnan cu nos tin cu bay haci den nos pais, no unicamente tin cu conduci na crecemento economico, pero tambe na un mehoracion social.” Sr. Eman a sigui enfatisando cu, “e inversionnan mester ta basta mas riba calidad cu cantidad.”

E vision cu Sr. Eman a papia di dje, por wordo mira tur dia. El a wordo traduci den diferente proyectonan rond di Aruba. Den nan por conta inversionnan extenso den renobacion urbano, den bario, di infrastructura y renobacion di scolnan rond di nos isla. E proyecto aki ta un parti di e prome fase di revitalisacion di Aruba, cu a cuminsa na aña 2009.

Di su banda, directora di Departamento di Monumento di Aruba a splica cu nan ta masha contento cu desaroyo di e proyecto di 'Remodelacion di Cas di Gobernador', aunke cu e proyecto a conoce un poco retraso mirando cu tabata tin algun desaroyo inespera. Sra. Webb-Kock a splica cu e proyecto ta e prome di tres fase. E fase aki ta yegando su final y cu ta encera e parti exterior di e cas. E di dos fase di e proyecto ta encera e parti paden di e edificio cu ta inclui betegeling por ehempel y e di tres fase ta e mobiliario di e edificio. E ultimo dos fasenan ta cay bou di financiamento di gabinete di Gobernador, y e prome fase, cu ta e edificio mes, ta financia pa Gobierno di Aruba.

Minister Sevinger, despues di e recorido den e proyecto, a bisa di ta satisfecho di por wak e desaroyo di e proyecto y ta contento di por wak un proyecto mas cu ta duna contenido na e vision amplio di mehoracion di Producto Aruba den su totalidad.

Sr. Omar Tromp, director di Felipe Construction a duna un update di e proyecto na miembronan di prensa, bisando cu e prome fase di e proyecto ta den su final y ta spera cu den algun siman e parti di pafo ta cla.

Expresionnan haci den e articulo aki no necesariamente ta refleha opinion di ArenaPoliti.co