Lider di MEP Evelyn Wever-Croes durante conferencia di prensa di MEP a pidi atencion pa e problema serio cu un grupo di studiante na Hulanda ta haya nan aden pasobra nan no a ricibi nan studielening ainda di Aruba. "Mi a worod yama pa varios mayor y studiante desespera. Y mi ta hopi preocupa pa e situacion aki, no solamente como mama, pero sigur como parlamentario. Mi a bai hasi un investigacion y a resulta cu desde cu tabata tin e caso di fraude den Departamento di Ensenjansa, a para renobacion of prolongacion di contractnan di fiansa di estudio. Y pesey e studiantenan aki ta cai den e problemanan. Algun ta riba caya pasobra nan no por a paga nan huur, otro no a paga college geld. Nos lo manda un carta cu urgencia pa Minister awe mes pa soluciona e problemanan aki, duna nan siquiera un voorschot, pendiente e formalisacion. Pasobra tin placa pa biahamento y fiestamento, pero no tin placa pa nos studiantenan. E prioridadnan di e gobierno aki nunca tabata corecto, pero ta bira tempo pa pone prioridad na ensenjansa y na nos studiantenan" lider di MEP a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co