Gobierno ta den full swing pa implementa y ehecuta e ley pa cobra pueblo pa parkeer den centro di ciudad. Segun director di Arubus entrante September caba lo cuminsa cobra. Fin di siman gobierno a organiza un back to school y tiendanan a bende 50% menos cu anja pasa. Esaki ta bisabo den ki situacion nos pais ta pasando aden.
E gobierno cu a destrui nos pais financieramente, caba cu tur placa cu tawata disponibel y aun sugui fia mas placa creando mas debe awor ta castiga e pueblo cu medida pa soluciona e problemanan cu nan a hinca nos pais aden. Mike Eman a propone na CFT cu e lo bin cu 24 medida pa sanea e situacion financiero cu e mes a crea. Un di e medidanan tawata pa bai reduce e landsbijdrage di gobierno na Arubus. Nan ta haci esaki door di aumenta e entradanan di Arubus por medio di bai cobra pueblo pa parkeer auto den oranjestad.

Habitantenan

Tin hopi habitante cu ta biba den centro di ciudad cu ta bai wordo afecta cu e decision aki. Esnan cu ta biba den a area aki no a pidi pa bai cobra nan pa parkeer nan auto dilanto nan cas. Tur esnan cu ta biba den e area lo tin cu bai paga un suma di 75 florin pa luna pa por parkeer nan auto dilanto nan propio cas. Esaki ta un abuso cu ta wordo cometi contra e habitantenan pasobra pa anja esaki lo costa cada habitante 900 florin. E mesun habitante aki ta pagando caba 30% mas na AOV, e ta pagando un aumento di grondbelasting, e tin cu bai paga 312 florin pa luna pa nan recohe su sushi y ta paga cada vez e haci compras 3.5% na BBO. Un gobierno inhumano so ta tuma un decision pa cobra un habitante pa para auto dilanti su propio cas.

Trahadornan den Caya Betico Croes

No solamente e habitantenan tin cu bai paga pa parkeer auto den Oranjestad y vecindario sino tur esnan cu ta traha den Caya Betico Croes y den e area aki tambe. Hopi di esnan cu ta traha den e area aki ta gana minimumloon y un medida manera esun di cobra pa parkeer auto ta pisa hopi mes riba nan cartera. E gobierno inhumano aki no a tende cuenta cu e trahadornan y ta bai cobra nan tambe.

Efecto

ATIA cu ta representa comercio a expresa cu un intruduccion di parkeermeters den centro di cuidad lo tin un efecto negativo ariba comercio. Según ATIA, uanbes bo ta bay cobra e consumidor pa parkeer auto den Caya Betico Croes y vencindario, hendenan no ta bay yega den mas. Aki ATIA a hasi un comparación cu Corsou, caminda na momento cu parkeermeter a keda introdusi esaki tabata tin un efecto contro productivo pa comercio den Punda y Otrabanda. No solamente na Corsow introducion di parkeermeters tawata tin un efecto contra productivo sino na Hulanda y Inglaterra ja caba decisionan a wordo tuma pa cuminsa elimina parkeermeters oa stimula mas hende yega den e centro di ciudad pa haci nan comprasnan.

Expresionnan haci den e articulo aki no necesariamente ta refleha opinion di ArenaPoliti.co