Na promer lugar mi kier a desea henter e pueblo di Aruba un feliz y prospero anja 2016. Cu Dios drama su bendiciona riba nos pueblo yena amor, dicha, salud y felicidad.
Nos a sera un anja 2015 hopi dificil caminda gobierno a abusa di nan poder y a castiga nos pueblo cu medida. Un gobierno sin compasion cu no a tene cuenta cu e poder di compra, no a tene cuenta cu e pobreza creciente na Aruba y envez cu nan reduci nan gastonan,nan a scohe pa laga pueblo sigui paga pa nan fiesta.
E anja 2015 gabinete Mike Eman 2 a scohe un biaha mas pa laga pueblo paga pa e disaster cu nan a causa. Nan kier oblige pueblo paga pa nan fiesta cu pueblo mes no a participa of tawata invita pe..Despues cu e mesun pueblo a dunanan un sosten amplio di 13 asiento nan ta sinti nan mes comodo cu nan por haci y deshaci y castiga pueblo manera nan ta haya ta bon pasobra manera nan ta bisa tur ora den parlamento di Aruba, ta nos ta manda!
Anja 2016 lo bira e anja di mas dificil den historia di nos pais. Gobierno tin planes pa bai aumenta e BBO un biaha mas y tambe lo mester bin cu mas medida pa cubri e gastonan envolvi cu e proyectonan PPP.  Manera esaki no ta suficiente gobierno lo bai cobra pa staciona auto den area di Palm Beach tambe.
Esaki ta un gobierno terco cu no a sinja su les pa loke a pasa cu parkeermeters den Playa y vencindario. Comerciantenan tawata sclama y benta a bai atras cu mas cu 50%. Empleadonan incluso e propio coordinadornan di gobierno ta keha cu paga pa yega trabou ta un abuso y e ta pisa hopi riba nan cartera. Varios carta a wordo manda di parti comercio pa gobierno pa atende cu e problema cu parkeermeters a causa pero gobierno NO ta duna oido na ningun hende. Nan ta kere cu e poder cu nan tin ta pa semper. Un gobierno cu no kier scucha su pueblo, no kier scucha comercio mester bai. Unda dialogo a keda? Unda e compasion pa pueblo a keda? Parkeermeters NO a sirbi e proposito di aumenta e benta pa comercio. Al contrario parkeermeters ta matando comercio den playa. No ta pornada e propio promer minister Mike Eman a duna durante e luna di December 9 dia gratis di parkeo. E la duna esaki mirando e gravedad di e situacion den Caya Betico Croes caminda comerciantenan a suplica gobierno pa tene cuenta cu nan. Gobierno ta bon na altura di e situacion aki cu tur hende ta kehando e parkeermetersnan aki pero asina mes ta bai introduce esaki den area di hotelnan y Palm Beach tambe. E gobierno aki a causa disaster, a ruina nos pais, a crea un deterorio hamas antes bisto y awor ta saca tur debchi cu e por saca di nos pueblo. Cobra pa parkeer den area di Palm Beach lo tin e mesun efecto negative riba comercio y sigur nan benta lo bai cai atras mescos cu loke a pasa den Playa. Pero or abo tin un gobierno cu a caba cu finanzas public y manda bo pais bancarota cu te hasta edificionan di gobierno nan a cuminsa bende ta bisa nos den ki situacion nan a laga nos pais despues di 6 anja.

Si den anja 2016 e pueblo aki NO lanta para e abusonan aki e clase media di Aruba lo desaparece y solamente lo tin hendenan Rico y esnan pober cu lo mester keda na merced di e gobierno aki! Esaki ta e vision cu Mike Eman tin pa nos pais. Crea mas pobreza y laga mas hende depende di gobierno pa por sobrevivi.

Expresionnan haci den e articulo aki no necesariamente ta refleha opinion di ArenaPoliti.co