E gobierno aki a para un gobierno cu ta abusando di pueblo. Un gobierno cu a pretende cu lo traha pa esnan di menos recurso y esnan mas vulnerabel den nos communidad. Un cos sigur cu e gobierno aki a demostra di ta un gobierno ignorante, un gobierno cu a bira ciego y sordo pa e realidad di nos pais.

Un di e medianan cu comercio, pueblo y e clase trahador ta sintiendo e efectonan ta cobramento pa parkeer den centro di ciudad. E promer 3 lunanan aki tawata un desaster den playa y vecinadario. Nos fraccion a bishita comerciantenan den Caya Betico Croes y tambe esnan cu ta traha den e tiendanan. Tin un disgusto enorma ta biba bao di comerciantenan y tambe bao di trahadornan. Ningun dia gobierno a envolvi comercio of e trahadornan promer cu a introduci e ley pa cobra pa parkeer. Un gobierno cu semper a promove dialogo ningun dia a dialoga cu pueblo y comercio. Comerciantenan a splica nos cu e promer 3 lunanan aki nan benta a cai cu 40% compara cu e mesun periodo anja pasa.

Tur hende sa cu na Aruba situacion no ta di gaba caba, negoshinan ta sufriendo, aki den playa. E comerciantenan mester a warda pa mas cu 5 aña pa e caya Betico Croes keda cla. Un proyecto cu por a dura 2 anja a dura 5 anja pasobra a inclui e locura di tram den e proyecto di renobacion di Caya Betico Croes. Como esaki tawata poco pa comerciantenan spues ta dal nan cu parkeer meters su tras, danja benta di comerciantenan. Contrario na gobierno comerciantenan no por keda fia placa, banconan no ta tene mucho consideracion cu e comerciantenan. Tin comerciantenan cu mester a sera nan negoshinan algun vez pa siman, otronan mester a kita hende for di trabou y ainda Otmar Oduber tin curashi di bisa cu parkeermeters ta yudando comercio.

Comercio a pidi un reunion cu Aruparking y minister Otmar Oduber pa atende cu nan preocupacionan. Durante e reunion aki un biaha mas Otmar Oduber a demostra su arrogancia y su ignorancia pa comerciantenan cu ta pasando den momentonan dificil. Te hasta e minister tawata chercha y haci mofa di e comerciantenan aki.

Segun Otmar Oduber ta cuestion di custumbra u una vez tur hende custumbra e parkeermetersnan lo sirbi nan proposito. Awe nos ta casi 3 luna despues di introduccion di parkeermeters y e conclusion di tur hende ta mesun cos, e ta matando playa y nan negoshi. Ningun hende ta bisa cu e parkeermetersnan a yuda den nada. Como gobierno na momento cu tin tanto keho riba introuccion di algo mester sinta cabez friew y evalua e situacion. No bai hunga arrogante y haci cu gobierno no por haci nada pa alivia e situacion.

Varios comerciante ta asina preocupa cu nan no sa si nan por wanta e sla aki pa largo te ora pueblo custumbra. Loke mas nos ta lamenta cu Otmar Oduber y e gobierno abusador aki ta cobra e clase trahador, esnan mas vulnerabel 75 florin pa luna pa por parkeer nan auto pa nan por yega trabou. Esaki simplemente ta un abuso pasobra con por ta posibel cu un persona mester paga 75 florin pa luna cual ta suma 900 florin pa anja just pa por yega su trabou. Segun Otmar Oduber na un forma masha arrogante a bisa cu esnan cu NO kier paga gobierno a regla parkeo social pa nan na entre otro Linear Park, banda di busstation Arubus y banda di Postkantoor. Nos kier puntra Otmar Oduber pakiko e mes no ta para su auto eynan, paga 75 florin pa luna y cana bai su trabou. Ni un hoge college van staat Algemene Rekenkamer no ta wordo respeta y mas bien tambe ta wordo perhudica pa nan por funciona manera mester ta.

Expresionnan haci den e articulo aki no necesariamente ta refleha opinion di ArenaPoliti.co