Riba prome dia di conferencia Green Aruba 2015 
Prome Minister tabata moderador di e panel di expertonan internacional 

ORANJESTAD – Polisanan Tecnico di Energia Renobabel tabata e topico principal durante e prome dia di e di seis Green Conference. Un panel di e figuranan mas prominente den e region y na mundo riba tereno di sostenibilidad y utilidad a sinta hunto cu Prome Minister Mike Eman na mesa, kende a fungi como moderador. Hopi ta e punto y argumentonan importante y interesante cu a bin dilanti den e sesion aki, uno cu por cierto a mantene e audiencia den sala principal di Marriott Ballroom hopi atento durante mas di un ora.

E asina yama ‘Joint Partnership Forum’ a conta cu participacion balioso di Sra. Danielle Schmidt di e Lighthouse Initiative di IRENA SIDS, Consul Interino di Merca Sr. Hormazd Kanga, Director Ehecutivo di Carilec Sr. Thomas Hodge, CEO di Rocky Mountains Institute/Carbon War Room Sr. Jules Kortenhorst y Sra. Dymphna van der Lans, CEO di Clinton Climate Initiative.

E grupo di lider di organisacionnan regional y internacional a discuti asuntonan tecnico y di poliza di Energia Renobabel hopi biaha poniendo e isla  Aruba como ehempel y elogiando e vision di Prome Minister Mike Eman y e avancenan haci durante su direccion den maneho publico. “No ta djis un papia mas, e ta real y e ta akinan cu nos por wak,” Sra. Schmidt a expresa den su prome turno na palabra, refiriendo na e metanan cu Aruba a pone su dilanti.

Schmidt a continua bisando cu Prome Minister Mike Eman ta un visionario cu no solamente a identifica e importancia di sostenibilidad, pero tambe a sa di enfoca riba e recurso humano dor di busca pa crea centro di conocemento y excelencia na Aruba. “Cambio ta duna hende miedo, pero tambe ta trece hopi oportunidad cune,” tabata su palabranan.

Consul Interino di Merca pa nos islanan ta comparti e pensamento aki “Esaki ta momentonan hopi emocionante pa e region.” Director Ehecutivo di Carilec, e asociacion di companianan di electricidad den Caribe, a bisa cu e ta hopi impresiona cu e infrastructura y e nivel di tecnologia na Aruba. Sin embargo, e ta kere cu ningun hende por baha warda y descansa riba su laurelnan pasobra, manera Sr. Kortenhorst a indica, continuamente tin avance y informacion nobo.

Di eynan e importancia pa nos comparti tur e recursonan aki y mantene nos region na un nivel di vanguardia pa crece hunto. “Si nos a wak 10 aña atras, ta hopi nos a avansa pero nos no mester relaha, pero sigui wak dilanti,” Sr. Hodge a bisa. Otro manera di splica esaki ta con CEO di Clinton Climate Initiative, Mrs. Dymphna van der Lans a trece dilanti, esta cu e miho manera pa midi nos exito ta con lihe nos por replica e resultadonan den otro paisnan dor di comparti e informacion cu nos tin.

Na final Prome Minister Mike Eman a gradici tur e panelistanan pa nan participacion y aporte na e topico. “Looking at our responsability beyond our inmediate interest’ y e ta kere cu esey a keda logra den e sesion aki. Como muestra di aprecio pa nan presencia, cada panelista a ricibi un regalo cortesia di Aruba Aloe Balm.

Expresionnan haci den e articulo aki no necesariamente ta refleha opinion di ArenaPoliti.co