ORANJESTAD – Siman pasa mi a wordo invita pa e evento anual di Camara di Comercio den cual a celebra 85 anja. Na prome lugar mi kier felicita Camara di Comercio cu e celebracion aki, y felicita nan especialmente pa e sosten cu Camara ta brinda comercio en general. Danki na e sosten aki nos economia por a conta riba inversionnan importante. 
Durante e presentacion di historia di Camara di Comercio, mi por a nota dos desaroyo hopi importante. E prome tabata e impacto cu e refineria tabata tin riba nos economia, y e di dos, e impacto asina positivo cu nos Status Aparte tabata tin riba nos desaroyo economico, y e bienestar cu esaki a trese pa henter nos comunidad.

MIKE EMAN AUSENTE
Mi ta lamenta si cu sr. Mike Eman a briya cu su ausencia na e evento annual aki, mustrando un falta di respet enorme. Segun e programa cu nos tur a haya e mester a hiba palabra, pero e no a asisti. Locual ta mas lamentable ta cu Mike Eman ta cla pa subi avion y bai papia na delaster un evento den exterior, gastando masha hopi placa di pueblo, pero na un evento asina importante pa Aruba, e ta briya cu su ausencia. Cu esaki Mike Eman a mustra un falta di respet grandi!

‘FROM RED TAPE TO RED CARPET’
Camara di Comercio a invita un tremendo orador, sr. Xavier Debrun di IMF, cu a duna algun ehempel con otro paisnan den mundo a logra bai di “red tape” pa “red carpet”. E enfoke principal den esaki ta cu e pais mester baha su debe nacional. Y apesar cu tur hende den e sala ta haya esaki logico, nos sa cu aki na Aruba e prioridad no ta wordo poni eynan. Tambe sr. Debrun a elabora riba flexibilisacion di Mercado laboral, y a splica e papel importante cu gobierno mester hunga den esaki. No djis cambia bo leynan pa hendenan wordo kita for di trabou, pero gobierno mester tin forma pa duna asistencia y ayudo na cada un di e hendenan ey. El’a menciona como ehempel un seguro contra desempleo cu ta duna e trahado un entrada pa por cubri e periodo cu e persona ta busca un otro trabou.

Mi ta felicita Camara di Comercio cu un otro evento anual exitoso, y mi ta desea Camara di Comercio, su president y board, hopi forsa, y sabiduria den e temponan dificil economicamente nos dilanti. E asistencia di Camara di Comercio den e temponan desafiante nos dilanti, lo ta crucial den trese e stabilidad economico y financiero cu nos pais mester asina tanto.

Expresionnan haci den e articulo aki no necesariamente ta refleha opinion di ArenaPoliti.co